UBT tapsyrý kezinde tártip buzǵandarǵa ekinshi múmkindik berilmeıdi
Aqmaral Aıtýarovanyń aıtýynsha, bıyl aqparattyq qaýipsizdikti qamtamasyz etýge erekshe kóńil bólindi, testileý protsesi shıfrlaý elementteri bar arnaıy baǵdarlamalar arqyly júzege asyrylady, sondyqtan ınternetke qosylýdyń basqa da tásilderi qoldanylmaıdy.
Burynǵydaı kez-kelgen gadjetti, uıaly telefondardy, saǵattardy, symdy jáne symsyz qulaqqaptardy, shpargalkalardy jáne kalkýlıatorlardy alyp júrýge tyıym salynady.
«UBT tapsyrýdyń 1-shi áreketi kezinde tártip buzylǵan jaǵdaıda ekinshi múmkindik berilmeıdi. UBT tapsyrýdyń 2-shi áreketi kezinde tártip buzýshylyqqa jol berilse, túlek grant alý konkýrsyna qatysý quqyǵynan aıyrylady», - deıdi Aqmaral Aıtýarova.
Sonymen qatar, ol UBT tapsyrýǵa ketetin shyǵynyń qysqarǵanyn tilge tıek etti.
«Bıyl UBT tapsyrýǵa ketetin shyǵyn aıtarlyqtaı qysqarady. Suraq kitapshalaryn, jaýap paraqtaryn jáne basqa qujattardy basyp shyǵarýdyń qajeti joq. Buǵan deıin QR Bilim jáne ǵylym mınıstrliginde habarlaǵandaı, bıyl UBT-da 600 mıllıon teńge únemdeledi. Kelesi jyldary bul soma azaıady, óıtkeni bıyl UBT-ny elektrondy formatqa aýystyrý shyǵyndary boldy»,-deıdi ol.
Aıta keteıik, bıylǵy oqý jylynda qalanyń orta bilim berý uıymdarynda 11 337 túlek mektepti bitiredi.
