UBT: talapkerler qandaı pándi jıi tańdaıdy
ASTANA. KAZINFORM – 159 myńnan astam adam naýryz aıyndaǵy UBT tapsyrdy. Onyń ishinde talapkerlerdiń 76,2%-y qazaq tilinde, 23,7%-y orys tilinde, 124 adam aǵylshyn tilinde testileýden ótti. Bul týraly Ǵylym jáne joǵary bilim mınıstrliginiń baspasóz qyzmeti habarlady.
UBT-da shekti baldy 75,5%-ǵa jýyq talapker jınady. Ortasha balǵa keletin bolsaq, ol 69 ball (5 pán boıynsha). Eń joǵary ball — 140, ony Almaty oblysynyń talapkeri jınady.
— Testke qatysýshylardyń basym bóligi «Bıologııa-Hımııa» kombınatsııalaryn tańdaǵan, atap aıtqanda, 17,3%-y tapsyrdy. «Matematıka-Fızıka» pánderin 17,1% tańdaǵan. Sondaı-aq, top-3 qataryna talapkerlerdiń 10,5% tańdaǵan «Matematıka-Informatıka» kombınatsııasy kirdi. Eń az tańdalǵan kombınatsııa — «Hımııa-Fızıka», ony 171 adam tapsyrǵan, — delingen habarlamada.
2025 jylǵy naýryz UBT-synyń qorytyndysy boıynsha mektep túlekteri «Oqý saýattylyǵy» pánin joǵary deńgeıde tapsyrdy. Ortasha eseppen, suraqtardyń 77,9%-yna durys jaýap berilgen.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda naýryz UBT-syna 386 talapker qatysqanyn aıta ketken jón.
— UBT ótkizý barysynda 235 ereje buzý anyqtalǵan. Onyń ishinde 85 talapker smartfon jáne shpargalka sekildi tyıym salynǵan zattardy alyp ótý áreketi saldarynan test tapsyrý múmkindiginen aıyryldy, testileý kezinde erejelerdi buzǵany úshin aýdıtorııadan 95 adam shyǵaryldy, al 55 adamnyń sertıfıkaty testileý beınejazbasyn tekserý nátıjesinde joıyldy. Ózge tulǵalar anyqtalǵan joq, — delingen habarlamada.
Talapkerler testileý aıaqtalǵannan keıin 30 mınýt ishinde apellıatsııaǵa bere aldy. Bul joly 22 myńnan astam ótinish qabyldanyp, olardyń ishinde 17 biregeı test tapsyrmasyna qatysty ótinishter qanaǵattandyryldy. Respýblıkalyq komıssııa jumysyn aıaqtady, talapkerlerdiń sertıfıkattary jeke kabınette qoljetimdi.
Aıta ketsek, 2025 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
Esterińizge sala ketsek, naýryzdaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, ótken jylǵy mektep jáne kolledj túlekteri, QR azamaty bolyp tabylmaıtyn ulty qazaq tulǵalar, sondaı-aq mektep bitiretin túlekter joǵary oqý oryndaryna aqyly negizde túsý úshin qatysty.
Aıta ketelik ulttyq biryńǵaı testileý qaǵıdalary ózgertilgen edi.