UBT suraqtaryn ınternetke taratqandardy ІІM anyqtaıdy

ASTANA. QazAqparat - QR Bilim jáne ǵylym mınıstrligi Ulttyq testileý ortalyǵy áleýmettik jelide taraǵan UBT suraqtarynyń sýreti boıynsha quqyq qorǵaý organdaryna shaǵymdandy, dep habarlaıdy QazAqparat tilshisi.

Bul týraly Ulttyq testileý ortalyǵy Ramazan Álimqulov Ortalyq kommýnıkatsııalar qyzmetinde ótken baspasóz máslıhatynda málim etti.

«Keıbir BAQ bıylǵy UBT suraqtary áleýmettik jelige tarap ketti dep aqparat jazdy. Bul boıynsha QR Іshki ister mınıstrligine hat joldadyq. Test tapsyrmalarynyń mazmuny, olardyń ınternette zańsyz taralýy boıynsha mán-jaıdy anyqtaýdy suradyq. Endi olardyń resmı jaýabyn kútemiz», - dedi ortalyq basshysy.

Sondaı-aq, testileýdiń alǵashqy úsh kúninde ereje buzǵan 3 mektep bitirýshi aýdıtorııadan qýylǵan.

«Birinshi jaǵdaıda mektep bitirýshi test kitapshasyn dárethanaǵa aparǵan jáne bir paraǵyn jyrtqan. Bul - óreskel zańbuzýshylyq bolyp sanalady. Ekinshi jaǵdaıda mektep túlegi aýdıtorııadan shyǵyp, mobıldi baılanys ustaıtyn jerge baryp, uıaly telefonmen sóılesken. Úshinshi bala da aýdıtorııadan shyǵyp, durys jaýaptar kodyn alaqanyna jazǵan. Úsh oqıǵany da memlekettik komıssııa ókilderi tirkeýge alyp, hattama toltyrdy, balalardyń jaýaptary joıyldy», - dedi R. Álimqulov.