UBT-nyń naqty nátıjesi tamyzda shyǵady
«UBT-nyń birinshi kúngi qorytyndysyna keler bolsaq, shekti baldy jınaǵandardyń sany 4 222 adamdy quraıdy. Bul test tapsyrýshylardyń barlyǵynyń 68,3 paıyzyna teń. Al shekti balldy jınaı almaǵandar - 1 964 test tapsyrýshy, ıaǵnı 31,7 paıyz. 130 balldan joǵary jınaǵandar - 39 túlek. Qazirgi tańda appelıatsııaǵa ótinishter qabyldanyp jatyr. Erejege sáıkes 13:00-ge deıin ótinishter qabyldanady», - dedi ol Ortalyq kommýnıkatsııalar qyzmetindegi brıfıng barysynda.
Onyń atap ótýinshe, jergilikti appelıatsııalyq komıssııa ótinishterdi qanaǵattandyrǵan jaǵdaıda respýblıkalyq appelıatsııalyq komıssııaǵa naqty sheshim qabyldaý úshin joldanady. Nátıjesi búgingi kúnniń sońyna deıin beriledi.
«Jalpy, UBT-nyń sońǵy nátıjeleri tamyz aıynda naqty bolady. Óıtkeni, bıyl norma engizildi. Sol normaǵa sáıkes, 25 tamyzǵa deıin barlyq testileý barysyndaǵy beınejazbalarǵa arnaıy baǵdarlamanyń kómegimen taldaý júrgizedi. Bul rette eger testileý barysynda test tapsyrýshy tyıym salynǵan zattardy paıdalanǵany anyqtalǵan jaǵdaıda olardyń nátıjeleri joıylady. Soǵan oraı eger ol memlekettik bilim berý grantynyń ıegeri bolsa, onda grant nátıjesi de joıylýy múmkin», - dedi ortalyq dırektorynyń orynbasary.
Sonymen qatar, ol bıylǵy erekshelikterge sáıkes, sanıtarlyq-epıdemıologııalyq jaǵdaıǵa baılanysty qatań sharalar qabyldanǵanyn aıtty.
«Keshe dene qyzýy bar 2 adam testileýge jiberilmedi. Olarǵa basqa kúni bólek aýdıtorııada test tapsyrý múmkindigi uıymdastyrylady», - dedi Naýjan Dıdarbekova.
