UBT nátıjesi boıynsha mektep dırektorlary jazalanbaıdy

ASTANA. QazAqparat - QR Bilim jáne ǵylym mınıstrligi Ulttyq biryńǵaı testileý nátıjesi boıynsha mektepterdiń arasynda reıtıng júrgizbeıdi. Bul týraly búgin Úkimettiń selektorlyq rejimdegi otyrysynda Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.

«Osy jyly UBT-ǵa qatysýǵa ótinish bergen mektep bitirýshiler sany 102 442 nemese jalpy mektep bitirýshiler sanynyń 70 paıyzyn quraıdy. Onyń ishinde 75 paıyzy qazaq tilinde, 25 paıyzy orys tilinde tapsyrady. Byltyrǵy jylmen salystyrǵanda UBT-ǵa jazylǵan túlekterdiń jalpy sany 10 myńǵa ósip otyr. UBT-ǵa baratyn balalardyń úlesi 70 paıyz bolyp qaldy jáne qazaq tilinde tapsyratyn balalardyń sany 5 paıyzǵa artty», - dedi mınıstr.

Sonymen qatar ol aǵymdaǵy jyly bitirýshilerge alǵash ret UBT-ny aǵylshyn tilinde tapsyrý múmkindigi berilgendigin eske saldy.

«Mınıstrlik UBT nátıjeleri boıynsha mektepterdiń reıtıngin júrgizbeıdi. Sondaı-aq ákimderdiń nazaryna UBT nátıjeleri boıynsha jergilikti jerlerde jazalaý sharalarynyń qabyldanbaý qajettigin arnaıy eskertkimiz keledi», - dedi Erlan Saǵadıev.

Sonymen qatar onyń aıtýynsha, bitirýshilerdiń UBT-ǵa daıyndyǵy úshin synama-onlaın testilerdiń fýnktsıonaly jaqsarǵan.

«Endi ony úıde de ótýge bolady. Búgingi kúnge deıin onlaın-test 145 myń ret tapsyrylǵan. Sonymen qatar mektepterdiń suranysy boıynsha aımaqtarda synaq testileri qaǵaz túrinde 390  myń ret alyndy. Buǵan qosa, mektepter 185 myń synama kitapshalardy surap otyr. Osylaısha, aǵymdaǵy jyly ár bitirýshi ortasha eseppen 7 ret synaq túrindegi testileýden ótedi», - dedi mınıstr.