UBT-ǵa uıaly telefon alyp kirgen eki túlektiń test nátıjesi joıyldy
SQO Bilim basqarmasy baspasóz qyzmetiniń málimetinshe, óńirde UBT 21 maýsymda bastaý aldy. Bıylǵy túlekter úshin ol karantındik sharalarǵa qatysty 30 maýsymǵa deıin jalǵasady. Óńirde barlyq mektep bitirýshiniń 75,2%, ıaǵnı 2,5 myńǵa jýyq túlek UBT-ǵa qatysady.
21 maýsym kúni jastardyń alǵashqy legi Jambyl jáne Jumabaev aýdandarynda test tapsyrdy. Birinshi kúnniń qorytyndysy boıynsha eskertý bolǵan joq.
Búgin Jambyl, Ǵ. Músirepov, M. Jumabaev jáne Aıyrtaý aýdandarynda 311 túlek testileýge qatysty. Alaıda eki talapkerdiń ózimen birge uıaly telefon alyp kirgeni anyqtalyp, olardyń test jaýaptary kúshin joıdy.
Jalpy SQO-da UBT segiz nysanda ótedi. Petropavl mektepteriniń túlekteri 24 maýsymnan bastap M.Qozybaev atyndaǵy Soltústik Qazaqstan memlekettik ýnıversıtetinde test tapsyrady.
«Bıyl Petropavl boıynsha 1629 adam test tapsyrýǵa ótinish berdi. Bul – mektep jáne kolledj túlekteri. Bıyl erekshelik kóp. Buryn bir lekte 580 adam testileýge qatyssa, endi 180 adamnan asyra almaımyz. Bir aýdıtorııada 20 adamnan artyq bolmaýy kerek. Túlekter ǵımaratqa kirmes buryn arnaıy tonnelden ótip, dezınfektsııalanady. Mindetti túrde maska kıip, áleýmettik araqashyqtyqty saqtaıdy», - deıdi qabyldaý komıssııasynyń jaýapty hatshysynyń orynbasary Almas Kenjeǵalın.
Bıyl sondaı-aq UBT túlekterdiń ruqsat etilmegen zattardy ózderimen alyp kirmeýine asa mán beriledi. Mamandardyń aıtýynsha, talapty buzǵandar birden ǵımarattan shyǵarylyp, UBT nátıjesi joıylady jáne synaqtan tek keler jyly ǵana qaıta ótedi.
Buǵan deıin UBT alǵashqy kúninde 164 túlekten test tapsyrý barysynda ruqsat etilmegen zattardyń alynǵanyn aıtqan edik.
Al UBT shettetilgen balalarmen arnaıy psıhologtar jumys istemek.
