UBT-ǵa daıyndyqta qandaı kemshilikter bar – Ortalyq dırektory aıtty
«Jalpy, barlyq Ulttyq biryńǵaı test ótkizý pýnktteri daıyn dep aıtýǵa bolady. Biraq, birneshe kemshilik bar. Mysaly, onlaın translıatsııa uıymdastyrý úshin biz 2 jolyn qarastyrdyq. Bir translıatsııany jergilikti atqarýshy organdar jáne biz bir translıatsııa uıymdastyramyz. Óıtkeni, bir translıatsııada aqaý bolsa, ekinshisi árdaıym qoljetimdi bolady. Qazirgi ýaqytta Qostanaı oblysynyń Jitiqara qalasynda máseleler bar. Ókinishke oraı, tıisti jumystar uıymdastyrylmady», - dedi Dıdar Smaǵulov Bilim jáne ǵylym mınıstrliginiń onlaın formatta ótken apparat jınalysynda.
Onyń aıtýynsha, memlekettik komıssııa otyratyn dálizderde 103 arnaıy kamera ornatylǵan. 43 pýnktte 20 maýsymǵa deıin kameralar ornatylady.
«Biraq, Ulttyq biryńǵaı test ótkiziletin 15 pýnktte jumys tıisti deńgeıde ótedi dep aıta almaımyn. 108 pýnktte barlyq materıal jınalatyn dálizderde kamera bar. 41 pýnktte 20 maýsymǵa deıin uıymdastyrylady. Al 12 pýnktte mundaı jumys uıymdastyrylmaǵan», - dedi ortalyq dırektory.
Osy oraıda QR Bilim jáne ǵylym mınıstri Ashat Aımaǵambetov UBT ótkizýge daıyndyq jumystarynyń barlyǵy 17 maýsymǵa deıin aıaqtalýy tıistigin atap ótti.
«Erteń barlyq pýnktti qabyldap alamyz. Áli de biz qoıǵan talaptarǵa saı jumys júrgizýge ýaqyt bar. Bıyl óte úlken ári qatań talap qoıyp otyrmyz. Sanıtaızerler qoıý, maskamen qamtý jumystaryn retteý qajet. Bıyl kalkýlıatorǵa ruqsat berý sheshimin qabyldadyq. Sondyqtan barlyq máseleni sheship, 17 maýsym kúni meniń deńgeıimde respýblıka boıynsha barlyq pýnktterdiń, Bilim basqarmalarynyń basshylarymen jınalys ótkizemiz. Sol jınalysta barlyq máseleni qarastyramyz»,- dedi mınıstr.
