UBT-dan shyǵarylǵan túlekter qańtardaǵy sertıfıkatpen oqýǵa túse alady

NUR-SULTAN. QazAqparat – UBT erejesin buzyp, bıyl test tapsyrý múmkindiginen aıyrylǵan túlekter qańtar aıyndaǵy test sertıfıkatyn paıdalana alady. Bul týraly QR Ulttyq testileý ortalyǵy túsindirdi, dep habarlaıdy QazAqparat.

«Dostar, eger siz UBT-ny 2020 jyldyń qańtarynda tapsyryp, shekti ball jınaǵan bolsańyz, sol sertıfıkatpen JOO-ǵa aqyly negizde túse alasyz. Óıtkeni zańnyń keri kúshi bolmaıdy, tipti maýsym aıyndaǵy testileýge kirmeseńiz nemese maýsymdaǵy UBT nátıjeńiz joıylǵan bolsa da, qańtar aıynyń UBT sertıfıkaty jaramdy bolyp qala beredi», - deıdi testileý ortalyǵy.

Aıta keteıik, joǵary oqý ornyna aqyly negizde túsý úshin UBT jylyna 4 ret ótkiziledi (qańtar, naýryz, maýsym jáne tamyz). Bul rette, oqýǵa túsýshiler bilim granty konkýrsyna qatysý úshin maýsym aıynda ótetin UBT-ny tapsyrýy qajet.

Bıyl 21 maýsym men 5 shilde aralyǵynda elimizdiń barlyq óńirinde Ulttyq biryńǵaı testileý ótedi.

Testileýdiń alǵashqy kúni 6 186 adam qatysyp, 164 talapker ereje buzdy jáne bıyl test tapsyrý múmkindiginen aıyryldy.

Al 22 maýsymda – testileýdiń ekinshi kúni respýblıka boıynsha 9 748 talapker qatysyp, onyń 261-i aýdıtorııadan shyǵaryldy.