«UBT-da ulttyń upaıy qashan túgendeledi?» - baspasózge sholý
*** «Egemen Qazaqstan» gazetiniń jazýynsha, «Jumyspen qamtý-2020 jol kartasy» baǵdarlamasyn iske asyrýǵa 2015 jyly 37,3 mlrd. teńge qarastyrylypty. Bul týraly Ortalyq kommýnıkatsııalar qyzmetinde «Jumyspen qamtý-2020 jol kartasy» baǵdarlamasyn iske asyrý barysy týraly» taqyrybynda ótken brıfıngte Densaýlyq saqtaý jáne áleýmettik damý vıtse-mınıstri Dáýlet Arǵyndyqov málimdegen. «Bıyl baǵdarlamany ári qaraı iske asyrýǵa 37,3 mlrd. teńge qarastyryldy. Onyń ishinde 13,8 mlrd. teńge baǵdarlamanyń birinshi baǵytyn qarjylandyrýǵa bólindi. Sonyń aıasynda 520 nysanǵa jóndeý jumystary júrgizilip, 30 nysannyń qurylysy jalǵasady. Jumyspen qamtý ortalyqtary arqyly olarǵa 4 myńdaı adam ornalastyryldy. 3,3 myń ózin-ózi jumyspen qamtyǵandar men jumyssyz azamatqa shaǵyn nesıe berýge 10 mlrd.-tan astam teńge qarastyrylǵan. Úshinshi baǵyt aıasynda, aǵymdaǵy jyly 1 myńnan astam adam kásibı oqýǵa jiberilip, jastar men turǵyndardyń maqsatty toptaryna jatatyn azamattar úshin 13 myńnan kem emes jumys orny quryldy», - dedi Dáýlet Arǵyndyqov. Maqala «Jumyspen qamtý salasyndaǵy jetistikter» degen taqyryppen berilgen. «Egemen Qazaqstan» gazetiniń senbilik sanynda QR Parlamenti Májilisiniń depýtaty Orazkúl Asanǵazynyń Elbasynyń «Barshaǵa birdeı osy zamanǵy memleket: bes ınstıtýttyq reforma» dep atalatyn sózine qatysty pikiri «Biz baǵyndyrar bıikter» degen taqyryppen berilgen. «Elbasy belgilegen osy bes ınstıtýttyq reformanyń qaı-qaısysy da mańyzdy desek te, osylardyń ishinde «Bolashaǵy birtutas ult» delingen salanyń mańyzy jasampazdyqqa jol ashqan jas memleket úshin asa aıryqsha. Sebebi, qoǵamdaǵy qandaı da bolsyn reformany júzege asyratyn jalpy áleýmet, tutas memleket halqy. Osy oraıdan kelgende, barlyq ekonomıkalyq, áleýmettik, saıası reformalardyń kez kelgeni sol halyqtyń birigýin, áleýmettiń judyryqtaı jumylýyn qajet etedi. Egemendigimizdiń alǵashqy sátinen bastap qoǵamdyq turaqtylyq pen kelisimge basty nazaryn aýdaryp kele jatqan Elbasy sol shaqta: «Biz kelisim saıasaty men parasatty ulttyq strategııasyz eshqandaı mindetterdi sheshe almaımyz», dep osy oıyn óz ustanymynda únemi basshylyqqa alyp keledi. Ony óziniń Máńgilik El strategııasynda da tolyqtyryp, tujyrymdap jetkizdi. Ony osy joly: «Máńgilik El ıdeıasy arqaýyndaǵy jumyldyrýshy qundylyqtar - azamattyq teńdik; eńbeksúıgishtik; adaldyq; oqymystylyq pen bilimdi qaster tutý; zaıyrly el - taǵattylyq eli. Osyndaı jaǵdaıda azamattyq ornyqty jáne tabysty memlekettiń eń senimdi irgetasy bolady», dep taǵy da osy máselege toqtaldy», halyq qalaýlysy. *** «Jurttyń jyl boıyndaǵy janjalyna «azyq» bolatyn Ulttyq biryńǵaı testtiń jyry taǵy da bastalǵaly tur. Bir qýanyshtysy, bul joly Bilim jáne ǵylym mınıstrliginiń basshylyǵy osy kezge deıin túrli syndarǵa sebep bolǵan kemshilikter men kedergilerdi túgel saraptap, tıimsiz tustarynan aryldyq dep sendirip otyr. Soǵan sáıkes UBT tapsyrýǵa taǵy da birqatar ózgerister engizilipti», - dep jazady «Aıqyn» gazeti senbilik sanyndaǵy «UBT-da ulttyń upaıy qashan túgendeledi?» degen taqyryptaǵy maqalasynda. Jarııalanymda Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń tóraǵasy Saıat Núsipovtiń testileýdegi basty ózgeshelikterdi aıtyp bergeni keńinen baıandalǵan. Sonymen birge maqala avtory jyl saıyn qazaq synybyna barýshylardyń qatary eselep artyp kele jatqany, muny Núsipov myrzanyń ózi de aǵymdaǵy jyly mektep bitirýshilerdiń ortasynda memlekettik tilde bilim alatyndardyń eki esege kóbeıgendigin aıtqany jazylǵan. «Osy tusta Bilim jáne ǵylym mınıstrliginiń ózi kóńil bólmeıtin bir ádiletsizdiktiń tóbesi shyǵady: memlekettik grant bitirýshilerdiń tildik úles kólemine qaraı emes, kópke túsiniksiz áldebir qaǵıdalarmen bólinedi. Sonyń saldarynan qazaq tobyndaǵy 1 granttyq orynǵa 8-10 bala talassa, orys tobynda 3 ary ketse 5 úmitkerden aspaıdy. Sońǵysynda básekelestiktiń az bolatyndyǵyn biletin bitirýshilerdiń birazy grantqa iliný úshin, amal joq UBT-ny orys tilinde tapsyrýǵa májbúr. Elbasynyń ózi bastap memlekettik tildi mektepten úıretýge shaqyryp jatqanda mınıstrliktiń mundaı túsiniksiz keritartpa áreketi qaıta oǵan tusaý salmaı ma!», - dep jazady basylym. Qasıetti qazaq jeriniń áleýeti dúnıejúziniń kóptegen elderin azyq-túlikpen qamtamasyz etýge qabiletti. Alaıda onyń qunaryn qorǵaý sharalary qolǵa alynbasa, keleshekte qalpymen shólge aınalyp, tipti sany qarqyndy óse bastaǵan Qazaqstan halqyn da asyraýǵa qaýqarsyz halge jetýi ǵajap emes. «Aıqyn» gazetiniń jazýynsha, keshe Senatta dál osy jer taǵdyryna qatysty keleli jıyn ótip, onda Joǵarǵy palata depýtattary Úkimet múshelerimen birge alqa quryp, aqyl qosyp, keler urpaqtarǵa Uly dalanyń ornyna qumdy daýyl kezgen shól dalany qaldyrmaýdyń jaıyn jan-jaqty qarapty. Basylymnyń jazýynsha, Aýyl sharýashylyǵy mınıstrligi Qazaqstanda topyraq qunarynyń qarqyndy tómendeýi júrip jatqandyǵyn aıtyp, dabyl qaqty. Bir ǵana derek: osydan 25 jyl buryn qazaq jeriniń gýmýs quramy joǵary egistik jerleriniń kólemi 1,6 mıllıon gektardy qurasa, qazir ol nebary 255,5 myń gektar ǵana! «Aýyl sharýashylyǵy mınıstrligi jerlerdi utymdy paıdalanýdyń jańa Erejelerin jasady. Ol boıynsha jańadan «egistik aınalymyn saqtaý», «jaıylymdarǵa ońtaıly júktemeni qamtamasyz etý», «topyraqtyń agrohımııalyq quramyn qoldaý», «fıtosanıtarııalyq is-sharalardy oryndaý», «óndiristik kórsetkishterdi saqtaý» boıynsha da talaptar qosyldy. Eger jerden aıyrylyp qalmaımyn dese, agrarshylar osylardyń barlyǵyn buljytpaı iske asyrýǵa mindetti», - dep jazady basylym «Jerdi paıdalanýkdyń jańa erejesi jasalady» degen taqyryptaǵy maqalasynda.
