UBT-da oqý jylynyń tórtinshi toqsanyndaǵy tapsyrmalar kezdespeıdi
«UBT-da oqý jylynyń tórtinshi toqsanyndaǵy tapsyrmalar kezdespeıdi. Jalpy, tórtinshi toqsanda balalar ótken materıaldardy qaıtalady. ıAǵnı, budan buryn ótken taqyryptardy taǵy bir sholyp shyqty. Sáıkesinshe, jańa taqyryp bolmaıdy. Tótenshe jaǵdaı kezinde barlyq maketterdi qaıta tekserdik», - dedi D. Smaǵulov Ortalyq kommýnıkatsııalar qyzmetinde.
Sonymen qatar ol UBT kezinde balalarǵa kalkýlıator paıdalanýǵa ruqsat etilgenin eske saldy.
Degenmen test tapsyrýshylar ózimen birge esepteýish quraldardy ákele almaıdy. Aýdıtorııalarda ár orynǵa kalkýlıator qoıylady.
Ulttyq testileý ortalyǵynyń dırektory ótinishter boıynsha testileý ýaqyty taǵy 10 mınýtqa uzartylǵanyn, UBT ýaqyty 4 saǵat bolatynyn atap ótti.
Budan buryn habarlanǵandaı, Dıdar Smaǵulov bıylǵy UBT-ny ótkizý tártibi jaıynda túsinik berdi.
Karantındik shekteýlerge baılanysty eldiń barlyq aımaqtaryndaǵy UBT ótkizý oryndarynda kúsheıtilgen medıtsınalyq-sanıtarlyq sharalar engiziledi. Ǵımaratqa kirgizý kezinde test tapsyrýshylardyń arasyndaǵy eki metrlik araqashyqtyqty qatań saqtaý arqyly maskaly rejım júzege asyrylady. Ár test tapsyrýshy 5 baqylaý kezeńinen ótetin bolady, onyń ishinde syrtqy kıimdi dezınfektsııalyq eritindilermen zalalsyzdandyratyn arnaıy dáliz arqyly ótý eskerilgen.
