UBT-da 136 ball jınaǵan túlek: Ár pánge repetıtor jaldap, kúnine eki-úsh saǵattan daıyndaldym

PAVLODAR. QazAqparat - Pavlodar oblysy boıynsha eń joǵary ball - 136 upaıǵa qol jetkizgen № 35 JOM túlegi Aıdos Qobylandy testileýge qalaı daıyndalǵanyn aıtyp berdi, dep habarlaıdy QazAqparat pavlodarnews.kz portalyna silteme jasap.

- Ár pán boıynsha repetıtor jaldap, kúnine eki-úsh saǵattan daıyndalýǵa týra keldi, - deıdi Aıdos. – Olar maǵan kóp kómektesti. Meniń oıymsha, jaqsy nátıjege qol jetkizý úshin repetıtormen jeke jumys istegen durys. Árıne, ata-anam men ustazdaryma da qoldaý kórsetkeni úshin alǵys aıtqym keledi.

Mektep túlegi kúndelikti ádeti boıynsha testileýge daıyndyq kezinde de tańerteń erte turyp júgirip, sportpen aınalysqan. Sondaı-aq kez kelgen tamaqty jeýden bas tartýǵa týra kelgen.

Al endi úlken synaqty oıdaǵydaı tapsyrǵan ol bos ýaqytynda kitap oqyp, fılm kórgendi unatatynyn aıtady.

Bolashaq stýdenttiń endigi jospary - joǵary áskerı oqý ornyna túsý úshin normatıvter men qujat daıyndaý.

- Men shekara qyzmetin tańdadym, - deıdi ol. – Bul - óte tamasha mamandyq. Jalpy test tapsyrý kezinde telefon nemese shpargalka alyp kirý qıyn, al ótip ketken kúnniń ózinde ony qoldaný múmkin bolmaıdy. Sondyqtan men óz bilimime senýge tyrystym.

Eske sala keteıik, 23-30 maýsym aralyǵynda Pavlodar qalasyndaǵy 37 mekteptiń 1150 túleginen UBT-ǵa 933 (81%), 2019 jyly – 750 (74%) bala qatysqan. Onyń ishinde qazaq tilinde – 378, 2019 jyly – 350.

Qala mektepteriniń 60 túlegi 100 jáne odan da kóp ball aldy.