UBT: Aqtóbede uıaly telefonmen ustalyp, synaqtan qýylǵandardyń 86-sy qateligin qaıtalady
Tamyz aıynyń 17-20 kúnderi aralyǵynda Aqtóbe qalasynda taǵy da ulttyq biryńǵaı testileý ótti. Bul jolǵy synaqqa naýryz aıyndaǵy aqyly UBT-ǵa tirkelgender men maýsym aıyndaǵy UBT-da nátıjesi joıylǵan, tyıym salynǵan zattardy paıdalanǵany úshin testileýden shyǵarylǵandar qatysty. Synaq talapqa saı ótýi úshin Bilim jáne ǵylym mınıstrliginiń buıryǵyna sáıkes «Aqtóbe - adaldyq alańy» jobalyq keńsesiniń jáne sybaılas jemqorlyqqa qarsy vedomstvonyń qyzmetkerleri baqylady.
«Aqtóbe oblysy boıynsha testileý emtıhanyna qatysýǵa 933 adam ótinish bildirip, sonyń 759 keldi. Onyń ishinde 67 túlek emtıhanǵa kirer aldynda tyıym salynǵan zattardy (uıaly telefondar, shpargalkalar t.b.) ózimen alyp kirgeni úshin jáne 21 emtıhan kezinde tyıym salynǵan zattardy paıdalanǵany úshin testileýden shyǵaryldy. Nátıjesinde 671 ýshy tapsyryp shyqty. Testileýdi uıymdastyrýshylar tarapynan kemshilikter bolǵan joq. Barlyq sanıtarlyq talap saqtalǵan. Onyń ishinde: dezınfektsııalyq tonnelden ótý, arnaıy dezınfektsııalanǵan kilemshede aıaq kıimdi zararsyzdandyrý, dene qyzýyn ólsheý, qoldy antıseptıkpen óńdeý, medıtsınalyq maskalarmen qamtamasyz etý.
Testileýge kirgizý jáne otyrǵyzý kezinde túlekter arasynda keminde eki metr ara qashyqtyq saqtaldy. Aýdıtorııalar tek 35% deıin toltyryldy. Aýdıtorııalar beınebaqylaý kameralarymen jáne arnaıy baılanys óshirgishterimen jabdyqtalǵan», - dep habarlady «Aqtóbe – adaldyq alańy» jobalyq keńsesiniń baspasóz qyzmeti.
