UBT: Aqtóbede 140 oqýshy synaq zalynan shyǵaryldy

AQTÓBE. QazAqparat – Aqtóbede UBT-nyń alǵashqy kezeńi aıaqtaldy. Úsh kúnde tyıym salynǵan zatty synaq zalyna alyp kirgen 140 oqýshy anyqtaldy, dep habarlaıdy QazAqparat tilshisi.

Aqtóbe oblysynda Ulttyq biryńǵaı testileýdiń alǵashqy kezeńi 16-19 qańtar aralyǵynda ótti. Oblys boıynsha 4500-den astam oqýshy qatysyp, sonyń 140-y aýdıtorııaǵa tyıym salynǵan zat kirgizgeni úshin zaldan shyǵaryldy.

«UBT-nyń birinshi kezeńi oblysta 5 jerde ótti. Olar Komsomol aýyly, Shalqar, Qandyaǵash, Hromtaý jáne Aqtóbe qalasy. Synaq talapqa saı ótýi úshin «Aqtóbe - adaldyq alańy» jobalyq keńsesiniń jáne sybaılas jemqorlyqqa qarsy vedomstvonyń qyzmetkerleri, arnaıy monıtorıngtik toptyń músheleri qadaǵalady. Baqylaýdyń qorytyndysy boıynsha Ulttyq birińǵaı testileý zalyna kirer kezde 80 oqýshydan, aýdıtorııada 60 oqýshydan uıaly telefon, test jaýaptary bar qaǵazdar anyqtaldy. Olar aýdıtorııadan shyǵarylǵanymen kóktemgi synaqqa qatysa alady», - dep habarlady «Aqtóbe – adaldyq alańy» jobalyq keńsesiniń baspasóz qyzmeti.