Ýaqytsha ustaý abaqtysynda óltirilgen Roskosmostyń atqarýshy dırektory - QR týmasy

ASTANA. QazAqparat - «Roskosmos» memlekettik korporatsııasynyń sapa men senimdilikti qamtamasyz etý jónindegi atqarýshy dırektory Vladımır Evdokımovpen qoshtasý ótti, dep habarlady Reseı ǵarysh vedomstvosynyń baspasóz qyzmetine silteme jasap «QazAqparat» HAA tilshisi.

Budan buryn habarlanǵandaı, Vladımır Evdokımov 2007 - 2009 jyldary «Korporatsııa «MıG» AAQ-da múlik urlaǵany úshin aıyptalyp, 2016 jylǵy 1 jeltoqsanda tutqyndaldy. Al 2017 jylǵy 18 naýryzda ýaqytsha ustaý abaqtysynda belgisiz sebeptermen qaza boldy.

Reseılik BAQ aqparatyna sáıkes, Evdokımov ótken senbi kúni tańerteńgi saǵat tórtter shamasynda óltirildi. Onyń kókirek tusyna jáne moınyna pyshaq jaraqattary salynǵan. Kúzetshi Evdokımovtiń denesin kameralardy aralaý barysynda dárethana bólmesinen tapty.

Vladımır Evdokımov Qazaqstanda, Qostanaı qalasynda týǵan. Ol 26 naýryzda 56 jasqa tolar edi.

Roskosmos onyń Reseı ǵarysh memlekettik korporatsııasynyń damýyna qosqan úlken úlesin atap ótti.