Ýaqyt ózgerisiniń densaýlyqqa áserin ǵylymı turǵyda zertteýge daıynbyz - DSM
ASTANA. KAZINFORM – Saýda jáne ıntegratsııa mınıstriliginde ýaqyt beldeýin ózgertýge qarsy petıtsııa qaralyp jatyr.
Talqylaýda birinshi bolyp sóz alǵan Densaýlyq saqtaý mınıstriniń birinshi orynbasary Tımýr Sultanǵazıev vedomstvo tarapynan bul másele boıynsha tıisti jumys tobyn qurylǵanyn aıtty.
«Onyń quramyna ǵalym mamandar men dárigerler, medıtsına ókilderi kirdi. Olar ýaqyt beldeýin ózgertý jónindegi sheteldik ǵylymı ádebıetti, ózge elderdiń tájirıbesin zertteý baǵytynda úlken jumys atqardy. Osy zertteýler negizinde ǵalymdar jasaǵan qorytyndy boıynsha, ýaqytty bir saǵatqa ózgertý men densaýlyqqa aıtarlyqtaı áseri arasynda eshqandaı baılanys joq.
Sondaı-aq, biz Dúnıejúzilik densaýlyq saqtaý mınıstrligine de júgindik. Ondaǵy sarapshylar da osy máseleni talqylaý úshin óz pikirlerin aıtty. Jalpy ǵalymdar adam densaýlyǵyna kún ýaqytyna barynsha jaqyn ýaqyt beldeýin turaqty qoldanýǵa keńes berip otyr. New England Journal of Medicine basylymynda jarııalanǵan zertteýdi qysqasha baıandap shyǵýǵa ruqsat etińizder. Zertteý qysqy jáne jazǵy ýaqytqa 1 saǵat aıyrmashylyǵymen kóshý adamdardyń kópshiliginiń densaýlyǵynda aıtarlyqtaı buzylystarǵa ákelmeıtinin kórsetken. Ýaqyt ózgerisine aǵza belgili bir ýaqyttyń ishinde uzaq merzimdi keri áserlersiz beıimdele alatyny aıtylǵan», - dedi ol.
Vıtse-mınıstr ýaqytty 1 saǵatqa jyljytý uıqyny retteıtin gormon – melatonın óndirisinde mınımaldy ózgerister týyndatady dep otyr.
«Journal of biological Britance-te jarııalanǵan zertteý aǵza ýaqyttyń mundaı jyljýyna 1-2 kúnde jáne birneshe aıda beıimdeletinin kórsetti. Jańa ýaqyt kestesine melatonın deńgeıi tez beıimdelip, qalypty uıqy rejımin qamtamasyz ete alatyny aıtylǵan. Taǵy da atap ótkim keledi, tolyqqandy zertteý júrgizýge tym az ýaqyt ótti. Sonyń ózinde osy kezeńde medıtsınalyq uıymdarǵa júginýshiler sany eshqandaı ózgermegen. Halyqtyń densaýlyq jaǵdaıy aıtarlyqtaı ózgergen joq. Ýaqyt beldeýi ózgertilgennen beri qysqa ǵana kezeń ótkenin eskersek, basqa beldeýge kóshýdiń densaýlyqtaǵy eleýli ózgeristerge sebepker bolǵan-bolmaǵanyn anyqtaý úshin tıisti ǵylymı zertteýler kerek. Mınıstrlik ondaı taldaý múmkindigin Ǵylym jáne joǵary bilim mınıstrligimen birlesip qaraýǵa daıyn», - dedi Tımýr Sultanǵazıev.
