Ýaqyt beldeýi: Mınıstrlik petıtsııa talabyn oryndaýdan bas tartty
ASTANA. KAZINFORM – Saýda jáne ıntegratsııa mınıstri Arman Shaqqalıev «Ýaqytty keri qaıtarý» petıtsııasy boıynsha qandaı sheshim qabyldanǵanyn málimdedi.
«Jumys toby usynǵan barlyq derekter men dáleldemelerdi, ǵylymı zertteýler men usynymdardy zerdeleı otyryp, Qazaqstan Respýblıkasynyń birqatar óńirlerin bir saǵatqa keri aýystyrý tabıǵı kún tsıklderine sáıkes keletini jáne ǵylymı zertteýler men usynymdarǵa negizdelgeni rastaldy. «UTC + 5» ýaqyt beldeýi Qazaqstan Respýblıkasy aýmaǵynyń kóp bóliginde tabıǵı tsıklge barynsha jaqyn standartty ýaqyt beldeýi bolyp tabylady. Standartty ýaqyt beldeýiniń oń áseri týraly negizdelgen halyqaralyq ǵylymı zertteýlerdi jáne ýaqyttyń aýysýy halyqtyń densaýlyǵyna keri áser etkenin rastaıtyn derekterdiń bolmaýy negizinde Saýda jáne ıntegratsııa mınıstrligi petıtsııany qanaǵattandyrýdan bas tartý týraly sheshim qabyldady», - dep jazylǵan mınıstrlik taratqan baspasóz-relızde.
Arman Shaqqalıev Densaýlyq saqtaý, Oqý-aǵartý, Ǵylym jáne joǵary bilim mınıstrlikteri «UTC + 5» ýaqyt beldeýiniń halyq densaýlyǵyna qalaı áser etetinin úsh jyl boıy zertteýdi usynǵanyn eske salady.
«Ulttyq ekonomıka jáne energetıka mınıstrlikterine jylý maýsymy men maýsymdyq ózgeristerdi eskere otyryp, óńirlerde elektr energııasyn tutynýǵa monıtorıng jáne taldaý júrgizý tapsyryldy. Eńbek jáne halyqty áleýmettik qorǵaý mınıstrligine uıymdar men kásiporyndarǵa kúndizgi ýaqytty eskere otyryp, jumys kestesin túzetý múmkindigin túsindirý usynyldy. Ótinish berýshiniń qabyldanǵan sheshimge Qazaqstan Respýblıkasynyń Ákimshilik rásimdik-is júrgizý kodeksiniń 91-babyna sáıkes shaǵymdanýyna quqyǵy bar», - delingen mınıstrlik málimetinde.
