TJM sarbazdary suranysqa ıe jumysshy kásipterin ıgeredi
Qazaqstan TJM áskerı bóliminiń merzimdi áskerı qyzmetshileri suranysqa ıe jumysshy kásipterin ıgeredi

2025 jyldy jumysshy kásipter jyly dep jarııalaǵan Qazaqstan Respýblıkasy Prezıdentiniń Jarlyǵyn iske asyrý sheńberinde Tótenshe jaǵdaılar mınıstrligi áskerı qyzmetshilerdi qajetti mamandyqtarǵa oqytýdy jalǵastyrýda.

Baýyrjan Momyshuly atyndaǵy 28237 áskerı bólimi, J. Jabaev atyndaǵy kásiptik kolledji jáne Mekteparalyq oqý-óndiristik kombınaty arasynda jasalǵan memorandým negizinde merzimdi áskerı qyzmetshiler, aspazshy, avtomehanık, slesar, shashtaraz, gaz dánekerleýshi, elektrık sııaqty mamandyqtar boıynsha oqýdan ótedi.

Merzimdi qyzmet aıaqtalǵannan keıin áskerı qyzmetshiler biliktilik týraly kýálik alady, bul olarǵa mansaptaryn senimdi qurýǵa jáne qazirgi eńbek naryǵynyń talaptaryna beıimdelýge múmkindik beredi.
— Biz jastardy áskerı qyzmetke daıyndap qana qoımaımyz, sondaı-aq olarǵa bolashaq úshin berik negiz bolatyn bilim men daǵdylardy úıretemiz. Bul olardyń armııadan keıingi kásibı qalyptasýy men tabysty ómirine qosylatyn mańyzdy úles, — dep atap ótti tótenshe jaǵdaılar mınıstri, general-maıor Shyńǵys Árinov.
Qazaqstan TJM bastamasy jastardy qoldaýǵa jáne jumysshy kásipteriniń bedelin arttyrýǵa, olardyń odan ári kásibı ósýi men ózin-ózi júzege asyrýyna jaǵdaı jasaýǵa baǵyttalǵan.
Osyǵan deıin jumysshy mamandyq ıelerine qaı salada kóp aılyq tóleıtinin anyqtadyq.