«Tusaýyn Elbasy kesken ul» - baspasózge sholý
«Egemen Qazaqstan» gazetinde «Thekvondo - Qazaqstanda qarqyndy damyǵan sport túri» degen maqala berilgen. Memleket basshysy Nursultan Nazarbaev Búkilálemdik thekvondo federatsııasynyń prezıdenti Chýngvon Chomen kezdesti. Qazaqstan Prezıdenti Búkilálemdik thekvondo federatsııasy basshysynyń sapary elimizdegi bul sport túriniń damýyna odan ári serpin beretinin aıtyp, rızashylyǵyn bildirdi. - Qazaqstannyń thekvondo federatsııasy Búkilálemdik thekvondo federatsııasy quramyna 1993 jyly kirdi. Osy kezden bastap sporttyq jekpe-jektiń osy túri bizdiń elde qarqyndy damı bastady, 11 myń adam belsene aınalysýda, 250-ge jýyq jattyqtyrýshy jumys isteıdi. Qazaqstandyq sportshylar álemdik jarystarda 9 qola medal ıelendi, al azııalyq deńgeıde altyn medal da bar. Bul tamasha sport túri odan ári damı beredi degen úmitimiz zor. Sebebi, ol jastardy tárbıeleýge jáne salamatty ómir saltyn nasıhattaýǵa baǵyttalǵan. Men sizdiń saparyńyz jastardyń nazaryn osy sport túrine odan ári aýdara túsedi dep senemin, - dedi Nursultan Nazarbaev. Buǵan qosa, Memleket basshysy bizdiń ulttyń jaýyngerlik ónerge beıim ekenin, Qazaqstan jekpe-jektiń ózge túrleri jáne sporttyń kúsh-qýatqa negizdelgen túrleri boıynsha jaqsy kórsetkishterge qol jetkizgenin atap ótti.
«Túıe túliginiń jyl sanaýdan qalaı qur qalǵanyna ańyzdan qanyqpyz. Tula boıyna adam tirshiligi úshin qajetti dúnıelerdi tutastyrǵan osy bir adal, momyn, kerbez túliktiń joly ómirde shynymen shektelip qaldy. Shet qalý, elenbeý, baýyrynan saýlaǵan asta-tók aq sútiniń, odan daıyndalǵan shubatynyń qunary belgili bolsa da, quny bolmaý, taǵysyn-taǵylar...»,-dep jazady «Egemen Qazaqstan» basylymy búgingi sanyndaǵy «Іshseń - shubat, jeseń - et, minseń - kólik» degen maqalasynda. Bul maqalada túıe sharýashylyǵyn damytý tasada qalyp kele jatqany kóterilip otyr.
***
«Aıqyn» basylymynda «Tusaýyn Elbasy kesken ul» degen maqala jarııalandy. «Bir kezde Elbasymen túrli sharalarda kezdesip, batasyn alǵan balalar búgin qaıda júr? Nendeı jetistikke jetti, qandaı bıikti baǵyndyrdy? Jalpy, olardyń ómir joly qalaı órildi? Osy maqsatpen suraý salǵanbyz. Bir sáttik júzdesý, birer mınýttyq tildesý balǵyndardyń taǵdyryn ózderi de kútpegen tosyn arnalarǵa baǵyttapty! Qazir olar elimizdiń ár túkpirinde, qoǵamnyń san salasynda qyzmet atqarýda. Keıbiri álemniń beldi ýnıversıtetterinde bilim alyp júr. Elbasynyń aldynda talantymen tanylyp, razylyǵyna bólenip, alǵysyn alyp, tilegin tyńdaǵan balalardyń ishinde ómirde de, ónerde de baǵy janǵandary barshylyq»,-dep jazaly gazet. Bilim men tárbıege aqyl men qaıratty ushtastyryp, belgili bir belesti ıgergen keshegi balalardyń, búgingi daralardyń jetistigin elge tanytý úshin Prezıdenttiń Baspasóz qyzmeti men «Aıqyn» gazeti «PREZIDENT PEN PERZENT» atty jobany júzege asyrýda. Aıdardyń búgingi keıipkeri - Shyǵys tehnıkalyq-gýmanıtarlyq kolledjiniń stýdenti Islam Asqarov.
Osy basylymnyń jazýynsha, keshe Ulttyq bank tóraǵasy Qaırat Kelimbetov Qazaqstannyń qarjy naryǵyndaǵy ahýal taqyrybynda jýrnalıstermen kezdesý ótkizdi. Tóraǵa men Almaty jýrnalısteri arasyndaǵy áńgime keshegi Elbasy Joldaýynan bastap aınalymǵa enýi kesheýildep jatqan 20 myńdyq banknotqa deıin jalǵasty.
Kezdesýdiń álqısasy Elbasy Nursultan Nazarbaevtyń «Qazaqstan joly - 2050: Bir maqsat, bir múdde, bir bolashaq» atty Joldaýynan bastaldy.
Memleket basshysynyń Qazaqstan halqyna Joldaýyn iske asyrý úshin Jalpyulttyq is-sharalar josparynyń ázirlenip jatqany belgili. Osy oraıda Ulttyq bank 2014 jyly ekonomıkanyń ósimin 6-7 paıyz deńgeıinde qamtamasyz etý, JІÓ-di jan basyna shaqqanda 14,5 myń AQSh dollaryna jetkizý boıynsha jaýapty oryndaýshylardyń qatarynda ekeni belgili. Jyldyq ınflıatsııany 3-4 paıyz kórsetkishte tómendetý boıynsha sharalar keshenin ázirleý, qarjy sektoryn 2030 jylǵa deıin damytýdyń tujyrymdamasyn ázirleý de Ulttyq banktiń mindetine kiretini belgili boldy. Bul týraly «Kelimbetov jýrnalıstermen kezdesti» degen maqalada tolyq berilgen.
«Aıqyn» basylymynyń jazýynsha, Astana ákimi Imanǵalı Tasmaǵambetov Elbasy Joldaýyndaǵy óńir basshylaryna qoıylar mindetterge keńinen toqtaldy. Imanǵalı Nurǵalıulynyń baılamynsha, bıylǵy Joldaý - osynaý ortalyq oıdy saralap, onyń árbir túıinin jańalap turǵan, halyq bolyp birigip, qoǵam bolyp jumylyp atqarar eń basty qujat. «Onyń taqyryptyq aty da eldiń búgingi babyn, erteńgi zatyn aıqyndap tur. Elbasymyz oǵan jetýdiń rýhanı toqtamyn ǵana emes, belgilengen mejeni 7 «besjyldyqqa» bólgen naqty josparyn kórsetip berdi. Muny ózi eseli eńbek pen tynymsyz tirliktiń, el bolyp jumylǵan yntymaq pen bereke-birliktiń nátıjesinde keletinin kesip aıtty. Eń mańyzdysy - 2050 jyly álemniń eń damyǵan 30 eliniń qataryna kirip, ekonomıkasy qýatty, damýy turaqty elge aınalý! Bolashaqqa kóz tigip, táýelsiz jerdi «Máńgilik el» etýdiń Uly jolyna túsý!». Bul týraly basylymdaǵy «Ulttyq ıdeıany tujyrymdap berdi» degen maqalada berilgen.
