Turlyhanov jańa tóraǵa retinde UWW-Asia Atqarý komıtetiniń alǵashqy keńesin ótkizdi
Jıyndy resmı ashyp bergen Qazaqstannyń grek-rım, erkin jáne áıelder kúresi federatsııasynyń prezıdenti Saýat Myńbaev atalǵan halyqaralyq uıymnyń atqarýshy komıtetiniń ofısi Qazaqstanda jumys jasap jatqanyna qýanyshty ekenin jetkizdi.
«Qazaqstan Kúres federatsııasynyń atynan sizderge alǵys bildirýge ruqsat etińizder. Bilesizder, bizdiń elimiz úshin kúres - ulttyq oıyn túri. Qazaqstan palýandary túrli álemdik týrnırlerde nátıjeli óner kórsetip keledi. Sondyqtan, biz atqarýshy komıtettiń birinshi keńesi Almatyda ótkizilip jatqanyna qýanyshtymyz, ári maqtan tutyp otyrmyz. Osy komıtettiń ofısi mamyr aıynan beri Almatyda jumys jasap jatqany bizdi qýantady. Atqarýshy komıtetke osy salada kóp eńbek sińirip kele jatqan Dáýlet Turlyhanovtyń tóraǵa bolyp saılanǵanymen quttyqtaýǵa ruqsat etińizder. Jumystaryńyz jemisti bolsyn», - dedi Qazaqstannyń grek-rım, erkin jáne áıelder kúresi federatsııasynyń prezıdenti Saýat Myńbaev.
Aıta keteıik, búgingi keńeske UWW-Asia Atqarýshy komıtetine múshelikke qaıta saılanǵandar men Birikke kúres álemi bıýrosynyń bas hatshysy - Hamıd Benıtamın (Iran), vıtse-prezıdentteri - Kıttıposh Sýchantabýtr (Taıland), Brıdjbýshan Sıngh (Úndistan), Kennet Lı (Koreıa), Hıroakı Tsýkamoto (ıAponııa), Jang Ie (Qytaı), Chang Kıý Kım (Koreıa) jáne qurmetti prezıdenti Ik Djong Kım (Koreıa) keldi.
Jıynda Azııa qurlyǵynda kúres túrlerin damytý baǵdarlamasy talqylandy. Azııalyq kúres federatsııasynyń atqarýshy komıtetine jańadan saılanǵan tóraǵa Dáýlet Turlyhanov aldaǵy ýaqytta dástúrli kúres túrlerin damytýǵa mán beretinin aıtty.
«Búgingi kúni dástúrli kúres túrlerine kóp mán berilip otyr. Onyń ishine, qazaq kúresi de kiredi. Iran «pehlevanı» ulttyq kúresin damytýǵa kóp qarajat bólip jatyr. Men Ulttyq Olımpıada komıtetinde Ulttyq kúres máselesin kótergenmin. Bolashaqta osy dástúrli kúresti damytýǵa kóńil bóletin bolamyn. Búgin atalǵan komıtettiń aldaǵy 4 jylǵa arnalǵan jospary jasaldy. Azııalyq keńeste 70-ten asa memleket bar. Onyń jaýapkershiligi mol. Bizdiń basty maqsatymyz - Azııa qurlyǵynda kúresti damytý. Búgin biz 7 máseleni talqyladyq. Atqarý komıetiniń jańa qurylymy men ofısi tanystyrylyp, Azııadaǵy kúresti damytý baǵdarlamasy men jańa veb saıt máselesi talqylandy. Ekonomıkalyq másele de kún tártibinde boldy. Qazirgi ýaqytta Azııalyq federatsııanyń esep shoty bos, sony toltyrý jaǵy boıynsha saıystar uıymtastyratyn bolamyz», - dedi Dáýlet Turlyhanov.
Aıta keteıik, Dáýlet Turlyhanov «Birikken kúres álemi» federatsııasynyń Azııalyq keńesiniń Atqarý komıtetine jańa tóraǵa bolyp, 2017 jyldyń 11 mamyr kúni saılandy. Bul shara Úndistannyń Nıý- Delı qalasynda ótti. Onda atqarý komıtetiniń shtab páterin Seýl qalasynan Almatyǵa kóshirý máselesi sheshildi. Sodan beri, komıtet ofısi Almatyda jumys istep keledi.
Jalpy, qazaq kúresi 2017 jyly 17 qyrkúıekte Ashhabadta ótetin Azııa oıyndarynyń baǵdarlamasyna qosylǵanyn eske sala keteıik. Bul týraly jyl basynda BAQ-qa bergen suhbatynda Dúnıejúzilik qazaq kúresi federatsııasynyń prezıdenti Serik Tókeev aıtyp bergen bolatyn.
«Biz uzaq ýaqyt boıy «Birikken kúres álemi» federatsııasymen kelissózder júrgizip, kelisimge keldik. 2017 jyldyń 19 qańtar kúni «Birikken kúres álemi» federatsııasynyń prezıdenti Nenad Lalovıch pen Azııa Olımpıada keńesiniń tóraǵasy Sheıh Ahmed ál-Fahad ál-Ahmet ál Sabah qazaq kúresi 2017 jyly Túrikmenstanda ótetin Azııa oıyndarynyń baǵdarlamasyna enetinine baılanysty kelisimshartqa qol qoıdy. Aldaǵy Azııa oıyndarynda balýandar qazaq kúresinen úsh salmaq boıynsha - 70 keli, 90 keli jáne 90 keliden aýyr, ıaǵnı túıe balýandar arasyndaǵy beldesýler ótetin bolady», - degen bolatyn Serik Tókeev.
Qazaq kúresi elimizde jáne álemde sońǵy 12 jylda qarqyndy damyp keledi. Qazirgi ýaqytta álemniń 40 elinde qazaq kúresi sportynyń federatsııalary ashylǵan. Bul aralyqta qazaq kúresinen alty álem chempıonaty, on bir Azııa birinshiligi, úsh álem kýbogy, úsh Eýropa chempıonaty jáne bir ret Afrıka chempıonaty ótken.
2015 jyldan bastap, qazaq kúresi «Birikken kúres álemi» (United World Wrestling) federatsııasyna múshe boldy.
