Túrkistannyń jeke dızaın-kody engiziledi
ASTANA. KAZINFORM – Túrkistan qalasynyń ákimdigi men máslıhatyna qosymsha 34 quzyret beriledi. Bul týraly búgin Májiliste «Túrkistan qalasynyń erekshe mártebesi týraly» zań jobasynyń tanystyrylymy barysynda Ulttyq ekonomıka vıtse-mınıstri Baýyrjan Omarbekov aıtty.
«Zań jobasy aıasynda Túrkistan qalasynyń ákimdigi men máslıhatyna qosymsha 34 quzyret berý kózdelgen. Bul turǵyda qala máslıhatyna 7 quzyret beriledi. Osy oraıda qala qurylysy reglamentin men qalanyń dızaın-kodyn, sáýlet kelbetin qalyptastyrý jáne qala qurylysyn josparlaý qaǵıdalaryn, ulttyq qolóner salasyndaǵy sheberler shyǵyndarynyń belgili bir bóligin bıýdjetten óteý qaǵıdalaryn, beınebaqylaý monıtorıngin júrgizý qaǵıdalaryn, kópshilikti tamaqtandyrý, saýda jáne qyzmet kórsetý statsıonarlyq emes obektilerin, jazǵy alańdardy ornatý qaǵıdalaryn, sondaı-aq Túrkistan qalasynyń aýmaǵynda nyshandy paıdalaný tártibin bekitý eskerilgen», - dedi B.Omarbekov.
Onyń aıtýynsha, qala ákimdigine 27 quzyret beriledi, olar negizgi 3 baǵytqa bólingen. Birinshi baǵyt qalanyń mádenı ıgiligi men rýhanı damýyn saqtaý máselelerin retteýge, sondaı-aq tarıhı-mádenı mura obektileriniń saqtalýyn qamtamasyz etýge baǵdarlanǵan.
Osy mindetterdi iske asyrý úshin Túrkistan qalasynyń ákimdigine kelesi quzyretterdi berý usynyldy:
- jergilikti mańyzy bar tarıhı-mádenı eskertkishterdiń paıdalanylýyna jáne olardy kútip-ustaý tártibine memlekettik baqylaýdy júrgizý;
- qalanyń tarıhı-mádenı mura obektilerin anyqtaýdy, esepke alýdy, saqtaýdy, zertteýdi, paıdalanýdy jáne olardyń jaı-kúıine monıtorıng júrgizýdi qamtamasyz etý;
- jergilikti mańyzy bar tarıhı-mádenı eskertkishterdiń ǵylymı restavratsııa jumystary boıynsha ǵylymı-jobalaý qujattamasyn kelisý.
«Ekinshi baǵyt kesene aınalasyndaǵy qurylys standarttaryn jáne qala aýmaǵynda biryńǵaı qurylys stılin qoldanýǵa baǵyttalǵan. Bul rette, Túrkistan qalasynyń ákimdigine kelesi quzyretterdi berý usynyldy: qalanyń dızaın-kodyn jáne qala qurylysy reglamentin ázirleý, qala qurylysy keńesin qurý jáne onyń erejesin bekitý», - dedi vıtse-mınıstr.
Úshinshi baǵyt týrıstik qyzmetke járdemdesý máselelerin retteýge jáne ony damytý úshin qolaıly jaǵdaılar jasaýǵa arnalǵan. Osy turǵyda Túrkistan qalasynyń ákimdigine týrızm ınfraqurylymyn damytý sharalaryn qabyldaý quzyretin berý josparlanǵan.
Budan buryn habarlanǵandaı, Qoja Ahmet ıAsaýı kesenesiniń aınalasynda qurylys shekteledi.
