Túrkistandyq dıqandar maqtanyń jańa sortyn ósirip jatyr
TÚRKІSTAN. KAZINFORM — Túrkistan oblysynyń ákimi Darhan Satybaldynyń bastamasymen kórshiles elderdiń maqta ósiretin ınvestorlarymen kelissózder júrgizilip, qolaıly kelisimder jasalǵan bolatyn. Osyǵan baılanysty maqta-toqyma klasterimen aınalysatyn ózbekstandyq eń iri kompanııalardyń biri – «Global textile» kompanııasy 2023 jyldan bastap Maqtaaral aýdanynyń naryǵynda jumys istep keledi.
Bıyl ekinshi jyl qatarynan Maqtaaral aýdany ákimdigimen birlese otyryp sapasyna kepildik berilgen maqta tuqymyn sharýalarǵa taratyp, ol úshin zań aıasynda qajetti kelisim-sharttar jasaldy. Atalǵan kompanııa Maqtaaral aýdanyndaǵy 3 myń gektarǵa jýyq jerge ózbekstandyq «Namangan» tuqym sortyn jetkizdi. Endi kúzge qaraı atalǵan sorttardyń maqta talshyǵyn satyp alýdy josparlap otyr.
Jýyrda «Global textile» kompanııasynyń ókilderi qýanyshty jańalyqty bólisti. Maqtaaral aýdanyna maqtanyń «Namangan-77» sorty jersinip qana qoımaı, jaıqalyp óse bastaǵan. Maqtanyń bir butasynda 20-dan astam jemis elementteri (búrshikter, gúlder) damýda. Mamandar bári jospardaǵydaı bolsa, Maqtaaral aýdanynda maqtanyń gektarynan 50 tsentnerden joǵary ónim alynatynyn boljap otyr. Bir aıta ketetin jaıt, maqtanyń kólemi ǵana emes, sapasy da jaqsarýda.
«Global textile» – maqtanyń shıtinen bastap jip ıirý, mata toqý, kıim tigýge deıingi aralyqtaǵy klasterdi tolyq qamtıtyn kompanııa. Qazirgi ýaqytta kompanııanyń Tashkent qalasy men Ferǵana oblysyndaǵy 15-ke jýyq kásiporynynda 5 myńnan astam adam jumys isteıdi.
Túrkistan oblysyákimdigi men ınvestor birigip, Maqtaaral aýdanynda 2 myńnan astam adamdy turaqty jumys ornymen qamtıtyn 5 iri kásiporyndy iske qosýdy josparlap otyr. Ol úshin 2023-2027 jyldarǵa arnalǵan «Global textile. Turkistan» jobasy daıyndalǵan. Quny 21 mıllıard teńge quraıtyn joba aıasynda logıstıka haby, maqtany bastapqy óńdeý zaýyty, trıkotaj maqta fabrıkasy, mata boıaý fabrıkasy jáne tigin fabrıkalary iske qosylady degen maqsat bar.
Búginde «Global textile» kompanııasy Maqtaaral aýdanynda ózderiniń alǵashqy maqta qabyldaý pýnktin ashyp jatyr.
