Túrkistandaǵy Qarabulaq aýylynda júk kólikteri tirkemesi qurastyrylady - fotorep
TÚRKІSTAN. KAZINFORM – Saıram aýdanyna qarasty Qarabulaq aýylynyń turǵyndary búginde eńbekqorlyǵymen elge tanylyp keledi. Máselen, Qazaqstan boıynsha eń úlken mal bazar osynda ornalasqan. Sondaı-aq, 60 myńǵa jýyq halqy bar kishkene ǵana eldi mekende elimiz boıynsha júk kólikterine arnalǵan tirkeme qurastyrylady.
Qarabulaq – shaǵyn ǵana aýyl bolǵanymen halqy óte eńbekqor. Munda nápaqasyn Jer-Anadan tergen dıqandar men tórt túlikti kóbeıtip, ári semirtip satatyn sharýalar turady. Sodan bolar biri tańerteń ertemen ketpen-kúregin qolyna alyp, baqsha ishinde júrse, endi biri jınaǵan kókónisterin qoltyqtap qalaǵa alyp ketedi. Bar maqsaty – úı irgelik jerden alǵan shaǵyn ónimdi satyp, aqsha etý. Sondaı-aq, ár sársenbi saıyn aýyldaǵy mal bazarda saýda qyzady. Tórt túligin jetektep elimizdiń ár aımaǵynan, tipti Ózbekstan men Qyrǵyzstannan keletinder kóp.
Taǵy bir aıta keter másele, aýyldaǵy árbir úıdiń aýlasyndaǵy jer bos jatpaıdy. Biri qyzanaq ekse, endi biri qııardan mol ónim alyp otyr. Tipti, kishkene ǵana jerge jylyjaı salyp, bir alqaptan eki-úsh ret ónim alyp jatqandar da bar.
Sondaı-aq, aýyldaǵy kóshelerden júk kólikterin kóp kezdestirýge bolady. Olardyń bir bóligi – jergilikti turǵyndardyń ósirgen jemis jıdegin alys-jaqyn qalalarǵa tasýǵa kelgender bolsa, endi bir bóligi – kóliginiń tirkemesin jóndetý úshin arnaıy at basyn burǵandar. Sebebi, Qazaqstandaǵy jalǵyz júk kólikteriniń tirkemesin qurastyratyn, ári qaıta jańǵyrtatyn kásiporyn Qarabulaqta ornalasqan.
Kuzov Karabulak óndiris ornynyń jumys istep kele jatqanyna 7 jyldyń júzi boldy. Alǵashqyda eki-úsh úıdiń aýlasyn biriktirip kásip bastaǵan jigitter búginde ondaǵan adamdy jumyspen qamtyp otyr. Negizinen munda júk kólikteriniń tirkemesi jańadan qurastyrylady. Odan bólek, tirkemeni jańartý, kólemin ulǵaıtý, kishireıtý, sozý sekildi qyzmet túrleri kórsetiledi.
«Biz bul kásipti 2017 jyly bastadyq. Qazir ózimizge qajetti qosalqy bólshekterdi Qaraǵandydan jáne Reseıden aldyryp jatyrmyz. Tipti Koreıadan, Taıvannan da tapsyrys beretin kezderimiz bolady. Eń bastysy – biz óz jasaǵan ónimderimizge kepildik bere alamyz», - dedi seriktestik dırektory Rystaı Rysqulov.
Kásiporyn jylyna 500 tirkeme shyǵarýǵa qaýqarly. Bul baǵytta arnaıy lıtsenzııa da alǵan. Degenmen, kúndelikti toqtaýsyz jumys isteýge kún raıy kóp kedergi keltiredi. Ásirese, kúnniń sýyǵynda syrtta júrip jumys jasaý qıyn. Sondyqtan, qysqy mezgilde ónim kólemi azaıady. Jalpy, bir tirkemeni jasaý men qaıta jańǵyrtý jumystarynyń baǵasy 300 000 teńgemen 8 mln teńgeniń aralyǵynda. Eger tapsyrys berseńiz talǵamyńyzǵa saı, sapasyn kóterip, sánin keltirip qurastyryp beredi.
«Bireýler tońazytqysh qoıyp ber dep keledi. Al, bireý tirkemesin sozdyrmaqshy bolady. Jalpy suranys kóp. El aýmaǵynan jáne kórshiles Ózbekstan, Qyrǵyzstan elderinen, tipti Reseıden keletinder bar. Eshqandaı jarnama bermeımiz. Barlyq tutynýshylarymyz bir-birinen esitip, habarlasyp jatady. Sondaı-aq, «Qazatomónerkásip» Ulttyq kompanııasy, «Dala-Trans» seriktestigi sekildi úlken fırmalarmen de jumys isteımiz. Olarda júk kólikteri kóp. Sondyqtan, jóndeýge, qajetti tirkemeni jasatýǵa kóp tapsyrys beredi», - dedi kásiporyn basshysy.
Búginde óndiris orny 80 adamdy turaqty jumyspen qamtyp otyr. Onyń 30-y – dánekerleýshi bolsa, qalǵany – árlep, boıaýshylar men keńse qyzmetkerleri. Al, kásiporynǵa jańadan kelgen jas mamandardy tájirıbeli qyzmetkerler qasyna alyp, jumystyń qyr-syryn úıretedi.
«Qazirgi tańda kásiporynnyń ornalasqan aýmaǵy – 2 gektar. Bolashaqta jańa ǵımaratqa kóshemiz dep josparlap otyrmyz. 8 gektar jerge jańa kásiporyn salyp jatyrmyz. Onda 9 myńǵa jýyq adam eńbek etetin bolady», - dedi Rystaı Rysqulov.
