Túrkistandaǵy azamattyq forýmda mańyzdy máseleler talqylandy
TÚRKІSTAN. KAZINFORM – Túrkistanda «Áleýmettik jaýapkershilik pen qoǵamdyq belsendilik: Azamattyq qoǵamnyń qozǵaýshy kúshi» atty HII óńirlik azamattyq forýmy ótti. Eń aldymen «Túrkistan oblysynyń Azamattyq Alıansy» zańdy tulǵalar qaýymdastyǵy nysanyndaǵy birlestik týraly «Elge etken eńbek» atty kitaptyń tusaýkeseri ótip, arnaıy beınerolık kórsetildi.
Keleli basqosýǵa Qyzylorda, Jambyl, Qostanaı, Shymkent, Ulytaý, Qaraǵandy, Aqtóbe jáne taǵy basqa oblystardan delegatsııa ókilderi qatysty.
Azamattyq qoǵam ókilderiniń basyn qosqan forýmda Túrkistan oblysy ákiminiń orynbasary Ertaı Altaev sóz sóılep, bul shara Prezıdent Qasym-Jomart Toqaevtyń bastamasymen júzege asyp jatqan «Halyq únine qulaq asatyn memleket» tujyrymdamasynyń naqty kórinisi ekenin atap ótip, qoǵamdyq uıymdar eldi órkendetý baǵytynda jumys isteýi kerek ekenin jetkizdi.
– Forým – azamattyq qoǵam men memlekettik organdar arasyndaǵy ashyq dıalogtyń, senim men seriktestiktiń jarqyn úlgisi. Oblys aýmaǵynda 700-ge jýyq úkimettik emes uıym tirkelgen. Olardyń 33,4 %-y qalalarda bolsa, 66,6 %-y aýdandarda ornalasqan. Qazirgi tańda úkimettik emes uıymdar azamattyq qoǵamdy damytý baǵyttarynda jumystar atqarýda. Bul – qoǵam ınstıtýttardyń damyp, kúsheıip kele jatqanynyń aıqyn dáleli. Oblys ákimdiginiń tıisti salalyq basqarmalary, aýdan, qala ákimdikteri men úkimettik emes uıymdar arasynda júıeli áriptestik ornap keledi. Memleket basshysynyń qoldaýymen jyl saıyn úkimettik emes uıymdarǵa memlekettik qoldaý qarjysynyń kólemi arta túsýde. Atqarýshy bılik pen tutas eldiń, úkimettik emes uıymdardyń birlesken jumysy arqyly oblys ekonomıkasy joǵary qarqynmen damyp keledi. Túrkistan oblysy qysqa merzimdi ekonomıkalyq ındıkator boıynsha eki aı qatarynan úzdik kórsetkish kórsetýde. Bıylǵy jyldyń 6 aıynyń qorytyndysymen ósim 118%-dy qurap, respýblıka kóleminde kóshbasshylyqty saqtap qaldy. Ónerkásip ónim kólemi 723,3 mlrd. teńgeni qurap, 13,5%-ǵa artty. Oblys ekonomıkasynyń negizgi salasy bolyp sanalatyn aýyl sharýashylyǵynda ónim kólemi 253,9 mlrd teńgeni qurap, ósim 104,7% deńgeıinde oryn aldy. Óndirilgen ónim boıynsha respýblıkada kóshbasshymyz, - dedi Ertaı Kenjebekuly.
Jıynda Qazaqstan Respýblıkasy Mádenıet jáne aqparat vıtse-mınıstri Aızada Qurmanov, «Qazaqstannyń Azamattyq Alıansy» zańdy tulǵalar qaýymdastyǵynyń prezıdenti Baný Nurǵazıeva, «Qazaqstan halqyna» qoǵamdyq qorynyń basqarma tóraıymy Lazzat Chınkısbaeva, Túrkistan oblysynyń qurmetti azamaty, qoǵam qaıratkeri Jamalbek Sháripbekov mazmundy baıandama jasap, azamattyq qoǵamdy damytýdaǵy orny men mańyzyn qalyptastyrý baǵytyndaǵy oı-pikir, usynystaryn ortaǵa saldy.
Forým barysynda azamattyq qoǵamnyń memlekettik basqarý júıesindegi alar orny men ortaq maqsattarǵa negizdelgen jobalar aıtylyp, josparlar pysyqtaldy. Sondaı-aq is-sharada oblysta memlekettik saıasatty nasıhattaý, eldiń yntymaǵy men birligin saqtaýǵa úles qosyp júrgen úkimettik emes uıym ókilderi marapattaldy.
Forým aıasynda Azamattyq qoǵamdy damytý tujyrymdamasy, tujyrymdamanyń birinshi kezeńin iske asyrý qorytyndylary, ony iske asyrýdyń ekinshi kezeńine usynymdar ázirleý», «Úkimettik emes uıymdar týraly» jáne «Memlekettik áleýmettik tapsyrystar týraly» Zań jobalary, «Zań jáne tártip – qoǵamdy shoǵyrlandyrýdyń negizi: ÚEU-nyń quqyqtyq aǵartýdaǵy róli», «Adal azamat» tujyrymdamasy: Azamattyq jaýapkershilik ekonomıkalyq ósý faktory» taqyryptarynda plenarlyq sektsııalar ótti.
