Túrkistanda kásipkerlerdiń qoldaýymen órt sóndirý beketi ashyldy

ASTANA. KAZINFORM — Túrkistan oblysynyń Qutarys aýylynda «Aýyl qutqarýshylary» baǵdarlamasy aıasynda salynǵan jańa erikti órt sóndirý pýnkti ashyldy, dep habarlaıdy TJM baspasóz qyzmeti.

Saltanatty rásimge Tótenshe jaǵdaılar mınıstri Shyńǵys Árinov, oblys ákimi Nuralhan Kósherov jáne jergilikti bıznes ókilderi qatysty.

Joba kásipkerlerdiń qoldaýymen júzege asyryldy. Olar nysandy salýǵa jáne jabdyqtaýǵa óz qarajattaryn saldy. Bastamany iske asyrýǵa belsene qatysqany úshin ınvestor Roman Nııazalıev TJM-niń vedomstvolyq nagradasymen marapattaldy.

— Biz salyp jatqan barlyq jobalardyń ishinde bul eń ómirlik mańyzy bar joba. «Aýyl qutqarýshylary» baǵdarlamasy týraly bilgen soń, biz oǵan qatysýdy uıǵardyq jáne bul bastamaǵa basqa da kásipkerler qosylady dep úmittenemiz, — dedi Roman Nııazalıev.

Eriktiler TJ mınıstrliginen órt sóndirý tsısternasyn, arnaıy kıim, jedel kólik jáne baılanys quraldaryn aldy.

— Kásipkerlerdiń syrt qalmaı, bizben birge erikti órt sóndirý beketteri jelisin damytyp jatqany qýantady. Olardyń óz aýyldarynyń qaýipsizdigine ınvestıtsııa salýy — bul áleýmettik jaýapkershiliktiń eń jaqsy mysaly, — dedi Shyńǵys Árinov.

Ǵımaratta kezekshiler bólmesi, ashana, sport zal, dýsh jáne demalys bólmesi qarastyrylǵan. Jańa beket Qutarys okrýgindegi 6 aýylǵa qyzmet kórsetedi, onda shamamen 8 myń adam turady.

Osyǵan deıin almatylyqtar 1939 jylǵy órt sóndirý ǵımaratynyń tarıhı kelbetin saqtaýdy ótingeni týraly jarııaladyq.