Túrkistanda «Garrı Poter» keıpindegi ustaz turady
TÚRKІSTAN. KAZINFORM – Túrkistandyq Arslan Atabekti oqýshylary Garrı Poter ustaz dep ataıdy. Sebebi, ár sabaǵyna kıno keıipkeri bolyp kıinip keletin ol sabaqty da kıno álemimen baılanystyryp ótedi.
Arslan Atabek - hımııa-bıologııa baǵytyndaǵy Nazarbaev zııatkerlik mektebininiń muǵalimi. Munda 7,8,10 synyptarǵa qazaq tili men ádebıeti páninen sabaq beredi. Árbir dáriske erekshe daıyndalatyn ustazdy shákirtteri de asyǵa kútedi. Sebebi, Garrı Poterdiń keıipinde keletin muǵalim balalarǵa qyzyqty tásilder arqyly bilim beredi.
Arslan Garrı Poterdiń kıimderin arnaıy Almatydan tapsyrys berip aldyrtqan. Shapany men qalpaǵyn kıip, kózildirigi men galstýgin taǵyp, qolyna taıaǵyn ustaǵanda kıno keıipkerin kórgendeı bolasyz.
«Oqýshylardyń qyzyǵýshylyǵyn zerttep kórdim. Saýalnama aldym. Onda 10 jýyq ertegi keıipkerlerin usyndym. Nátıjesi boıynsha Garrı Potter keıipkeri eń kóp daýys jınady. Sodan sabaǵymdy atalǵan keıipkermen baılanystyryp ótýdi jón kórdim. Tamasha áser qaldyrdy. Oqýshylarda kóterińki kóńil kúıde, sabaqqa belsendi qatysty. Sodan, jobany jetildirýdi oıladym. Alǵashqyda ýnıversıtet bitirgen kezde kıgen mantııammen keıipkerdiń obrazyn salyp júrdim. Keıinnen Almatydaǵy Garrı Poterdiń kıimderin satatyn dúkenge tapsyrys berip, kıimderin aldyrttym» - deıdi ol.
Búginde ustaz ár sabaǵyn kıno sekildi ótedi. Ózi Garrı Potter bolsa, shákirtterine sol fılmdegi Ron Ýızlı, Germıona Greındjer degen esimder bergen. Sondaı-aq, oqýshylardy «Grıffındor», «Pýffendýı», «Kogtevran», «Slızerın» atty toptarǵa bólip, jarystyrady.
«Oqýshylardyń sabaqqa degen qyzyǵýshylyǵyn arttyrýǵa Garrı Poter arqyly túrli ádis-tásilderdi qoldaný óte jeńil. Baǵalaý júıesi bolsyn, keri baılanys júıesi bolsyn ár túrli tapsyrmalar qyzǵýshylyqpen oryndalady. Sondaı-aq, bul sabaqtyń qyzyqty ótýine jaǵdaı jasaıdy. Alǵash ret keıipkerdiń kıimin kıip kelgen kezde barlyǵy tań qaldy. Kúnde kórip júrgen muǵalimderi basqa obrazben kelgen soń, barshasy jańasha kózqarasta boldy. Árıne bul men úshin ońaı bolǵan joq, biraq shyn júrekten jasaldy» - deıdi ustaz.
Arslan Shyńǵysulynyń sabaq ótýdegi jańa ádis-tásilin áriptesteri men mektep basshylyǵy da jaqsy qabyldaǵan. Qoldaýda bildirgen. Tipti, mektep ishinde jańa ádis tez tarap, tyń tájirıbe qoldanysqa engen. Máselen, tarıh pániniń muǵalimi M.H.Dýlatı keıipine enip sabaq ótken. Onda da ustaz ejelgi kezeńdegi stılmen kıinip kelgen. Al, hımııa pániniń muǵalimi KNB qyzmetiniń obrazyn somdap, qylmys jasaǵan kúdiktilerdi arnaıy qospa arqyly qolǵa túsirgen.
«Bul jerdegi maqsat - janrlyq sabaqtar arqyly oqýshylardyń synı oılaý qabiletin damytý. Janrlar arqyly aıtylym daǵdylaryn, tildik quzyrettilikterdi jetildirý. Trendtegi fılm, mýltfılm, komıks, kitap, vaın keıipkerleri retinde oqýshylarǵa sabaqty túsindirý arqyly qyzyǵýshylyqtaryn arttyrý. Muǵalim oqýshylarǵa ár túrli keıipkerler beınesinde sabaq ótedi. Sol arqyly oqýshy ár sabaq saıyn qyzyǵýshylyǵan joǵaltpaıdy. Oqýshylardyń ómirindegi kontentpen baılanysqan sabaq jaqsy túsinýine jol ashady. Tematıkalyq sabaqtar oqýshylardyń sol álemdegi basty keıipker rólinde sheshim qabyldap, tapsyrmalar oryndaýyna múmkindik beredi» - deıdi muǵalim.
Arslan Shyńǵysuly bul tásildi Almaty qalasynda ótken jarysqa usynyp, qorǵap shyqqan. «Daryndy balalarǵa talantty ustazy» atty Respýblıkalyq jarysta tyń ıdeıasy úzdik shyǵyp, úshinshi oryndy enshilepti.
«Jarysqa barar kezde jobany áriptesterimmen jeke-jeke talqyladyq. «Qandaı metodıka bolady?», «tapsyrmalardy baǵalaý qalaı júzege asady?» osy jaǵyna mán berdik. Ekspert muǵalimder jan-jaqty talqylap keńesterin berdi. Sodan jobany jetildirip, jarysqa usyndyq» - deıdi ol.
Búginde ustazdyń shákirtteri respýblıkalyq, oblystyq olımpıadalardan júldeli oryndardy ıelenip keledi. Odan bólek, onlaın jarystardan da júlde alyp kelip jatqandary kóp. Shákirtterimen maqtanatyn ustaz, aldaǵy ýaqytta da tyń jobalardy júzege asrýdy josparlap otyr.
«Men Jambyl oblysy T.Rysqulov aýdanyna qarasty Qulan aýylynda týyp óstim. Sol jerde mektep bitirdim. Keıin Túrkistan qalasyndaǵy Q.A.ıAsaýı atyndaǵy HQTÝ joǵary bilim aldym. Eńbek jolymdy 2021 jyly Nazarbaev mektebinde bastadym. Jas ustaz retinde biliktiligimdi arttyryp, tájirıbe jınaqtap jatyrmyn. Qoldaý bildirip júrgen barsha áristerterime alǵysymdy aıtamyn» - deıdi Arslan Atabek.
