Túrkistanda 90 oryndyq «Shuǵyla» ońaltý ortalyǵy ashyldy
TÚRKІSTAN. KAZINFORM — «Shuǵyla» ońaltý ortalyǵynda 3-18 jas aralyǵyndaǵy tirek-qımyl apparaty buzylǵan múmkindigi shekteýli balalar em qabyldaıdy, dep habarlaıdy Túrkistan oblysy ákiminiń baspasóz qyzmeti.
Túrkistan oblysy Saýran aýdany, Oranǵaı aýylynda QR Konstıtýtsııasynyń 30 jyldyǵy merekesi qarsańynda 90 oryndyq arnaýly áleýmettik qyzmetter kórsetetin «Shuǵyla» ońaltý ortalyǵy paıdalanýǵa berildi.
Áleýmettik nysannyń ashylý saltanatyna Túrkistan oblysynyń ákimi Nuralhan Kósherov qatysyp, jergilikti turǵyndardy quttyqtap, bul ıgi bastamany qoldady.
Ortalyqtyń qurylys jumystary tolyq aıaqtalǵan. Jobanyń jalpy quny — 3 121,7 mln teńge. Munda 90 balaǵa arnaýly áleýmettik kómek kórsetilmek. Onyń 60-y statsıonarlyq, 30-y jartylaı statsıonarlyq negizde. Ortalyq 8 baǵyt boıynsha áleýmettik-turmystyq, medıtsınalyq, psıhologııalyq, eńbek, pedagogıkalyq, mádenı, quqyqtyq jáne áleýmettik-ekonomıkalyq qyzmet kórsetedi.
— Sizderdi Qazaqstan Respýblıkasy Konstıtýtsııasynyń 30 jyldyǵymen shyn júrekten quttyqtaımyn! Osy mańyzdy mereke qarsańynda oblysta birneshe áleýmettik nysan paıdalanýǵa berilip jatyr. Memleket basshysy Qasym-Jomart Kemeluly Toqaev óziniń Joldaýynda: «Biz erekshe qajettilikteri bar adamdar úshin birdeı múmkindik jasaýǵa mindettimiz», degen bolatyn. «Shuǵyla» ortalyǵy — osy naqty nıetterdiń aıqyn kórinisi bolary anyq. Bul — jaı ǵımarat qana emes, bul — balalardyń bolashaǵyna degen úmit, ata-analarǵa senim, qoǵamdaǵy meıirim jáne teń múmkindik mekeni. Dál osyndaı Ortalyqtar jyl sońyna deıin oblysymyzdyń eki qalasynda ashylady. Sondyqtan ár balanyń armanyna qanat bitirip, ómirine jaryq syılaý — bizdiń basty mindetimiz. Qurmetti ata-analar, «Shuǵyla» ortalyǵy sizderge senimdi tirek bolady dep senemin, — dedi Nuralhan Kósherov.
Jańa ortalyqqa oblys ákiminiń atynan mýzykalyq aspap (pıanıno) syıǵa tartyldy.
Ortalyq zamanaýı qural-jabdyqtarmen tolyq qamtamasyz etilgen. Munda kópfýnktsıonaldy ústelder, pressoterapııa, qysqa tolqyndy terapııa apparattary, massaj jáne fızıoterapııa kabınetteri, sondaı-aq montessorı, sensorlyq jáne psıhomotorıka bólmeleri túrli dıdaktıkalyq quraldarmen jabdyqtalǵan.
Sonymen qatar syrtqy alańdarda kishi fýtbol, vorkaýt, jazǵy sahna, al ishki keńistikte sport jáne akt zaldary qarastyrylǵan. Múgedektigi bar 1-10 synyp oqýshylaryna arnalǵan oqý kabınetteri de zamanaýı jıhazben jabdyqtalǵan.
Dál osyndaı ortalyqtar jyl sońyna deıin taǵy eki qalada ashylady. Saryaǵash jáne Túrkistan qalalaryndaǵy 100 oryndyq «Aýtızm ortalyqtary» balalar úshin qyzmet jasaıtyn bolady.
Aıta keteıik, búginde Túrkistan oblysynda 101 405 múgedektigi bar azamat esepte tur. Onyń 15 myńy — balalar men jasóspirimder. Olardyń ishinde 6 736 adam arnaýly áleýmettik qyzmettermen qamtylǵan.