Túrkistanda 68 jastaǵy alty dúrkin álem chempıony turady
TÚRKІSTAN. KAZINFORM - Túrkistandyq Ábdisadyq Halılaevty jerlesteri «Álem chempıony» atap ketken. Sambo kúresinen qarsylas shaq keltirmeıtin qarııa áli kúnge deıin jarystarǵa qatysyp, boz kilemde kúresedi. Tipti, ardager sportshylar arasynda ótetin álemdik saıystarda 5 dúrkin chempıon bolyp, elimizdiń abyroıyn asqaqtatqan.
Jasy jetpiske kelgen qarııanyń sportty janyna serik etkenine 50 jylǵa jýyq ýaqyt boldy. Tańerteń ertemen turyp júgirý kúndelikti ádeti. Odan bólek, jattyǵý zaldaryna baryp, denesin shynyqtyryp otyrady. Jastarmen birge fýtbol, basketbol, voleıbol oınaıdy. Kúrestiń tásilderin qaıtalap, tájirıbesin shyńdaıdy.
«Q.A.ıAsaýı atyndaǵy HQTÝ jumys isteımin. Oqý saýyqtyrý bóliminiń aǵa bapkerimin. Jastarǵa 5 kún boıy sabaq beremin. Ári jastarmen birge ózimde jattyǵamyn» - deıdi qarııa.
Ótken jyly Oral qalasynda uıymdastyrylǵan ardager sportshylar arasyndaǵy álem chempıonatynyń vıdeosy áleýmettik jelide keńinen tarady. Onda Ábdisadyq Halılaevtyń qarsylasyn aldap, shalyp qulatqan áreketi kópshilikti súısintti. 18 elden kelgen 800-den astam sportshy qatysqan saıysta túrkistandyq aqsaqal 98 keli salmaqta jarys jeńimpazy atandy.
«Ózim 92 keli salmaqtamyn. Qarsylasym 98 salmaqtaǵy álemniń 2 dúrkin jeńimpazy boldy. Ol maǵan deıin úsh adamdy jyqty, men Moldavııa men Qyrǵyzstannan kelgen sportshyny jeńgen edim. Ár shyqqan saıyn qarsylasymnyń áreketin baqylap otyrdym. Kúshi de, salmaǵyda menen basym boldy. Degenmen, ózim daıyndalǵan ádispen 15 sekýndta taza jeńiske jettim» - deıdi ol.
Ábdisadyq Nurlaquly 2011 jyly Pragada, 2012 jyly Balgorııada, 2013 jyly Afrıkada, 2023 jyly Oral qalasynda sport sheberleri arasynda ótken álem chempıonatynda jeńimpaz atanyp, álem chempıony ataǵyn alǵan. Sondaı-aq, sambo, dzıýdo, qazaqsha kúresten sport sheberi, ári sambodan halyqaralyq dárejedegi tóreshi. Qazirgi kezde qarııa aldaǵy ótetin jarystarǵa daıyndalyp jatyr.
«Meniń ózindik taktıkam bar. Sol ádis-tásilderdi qoldanýǵa tyrysamyn. Sport bolǵan soń, barlyǵy daıyndyqpen keledi. Jalpy boz kilemde qıyndyqtarda kezdesip jatady. Jasym jetpiske kelgende maǵan salmaq qýý qıyn. Qazir 92 salmaqtamyn, negizi 88-ge túsýim kerek. Kóp jaǵdaıda salmaǵym jetpegen soń, ózimnen úlkendermen kúresemin. Jarysqa myqtylardyń myqtysy keledi. Sondyqtan qol-aıaǵymdy aýyrtyp almaıyn dep ýaıymdaımyn» - deıd sport sheberi.
Ábdisadyq Halılaev 1980 jyly Máskeýde ótken olımpıadaǵa jankúıer bolyp qatysqan. Sol kezde týrıstter arasynda ótken júgirý jarysynan 2-shi oryndy ıelendi. Odan keıinde el ishindegi kóptegen jarystardan alyp kelgen júldesi kóp. Sondaı-aq, sport sheberinen tálim alǵan shákirtteri de baıraqty básekelerde kók týymyzdy kókke kóterip, ánuranymyzdy shyrqatyp júr.
«Q.A.ıAsaýı atyndaǵy HQTÝ ashylǵaly beri eńbek etip kelemin. Jáı muǵalim bolyp qyzmetke ornalasqan bolatynmyn. Qazir professor atandym. Osy jyldar ishinde kóptegen shákirt tárbıeledim. Dombaı Bazarbek, Kámshat Ahmetova, Ordabek Óserov, Darhan Tórádiluly, Gúlmıra Ahmetova, Nyshanbaı Qudaıbergenov sekildi shákirtterim Qazaqstannyń birneshe dúrkin chempıony boldy. Іshinde Azııa aýmaǵynda ótken jarystarǵa da baryp, júlde alyp kelip jatqandary bar» - deıdi Ábdisadyq Nurlaquly.
Búginde 68 jasqa tolyp otyrǵan qarııa 6 ul-qyzynan 18 nemere súıip otyr. Barshasa álem chempıony atanǵan atalarymen maqtanady.
