Túrkistan tórinde tól kúresimizden Azııa chempıonaty ótedi
ASTANA. KAZINFORM — Aldaǵy 27-30 qazan kúnderi aralyǵynda Túrkistan tórindegi Olympic Center sport kesheninde eresekter arasynda tól sportymyz — qazaq kúresinen Azııa birinshiligi ótedi.
Túrki dúnıesiniń rýhanı ordasyna aınalǵan qasıetti Túrkistan qalasynda ótetin saryqurlyq dodasynda erler men áıelder ózara 16 salmaq dárejesi boıynsha synǵa túsedi. Bási bıik dodaǵa Azııa qurlyǵynan Qyrǵyzstan, Tájikstan, Túrkimenstan, Úndistan, Japonııa, Iran, Mońǵolııa, Pákistan qatarly 15-ke jýyq memleketten 200-ge jýyq balýan boz kilemde kil myqtyny anyqtamaq.
Atalǵan Azııa alamanynda el namysyn eń tańdaýly qazaq kúresiniń sheberleri qorǵaıdy. Qazaqstan Ulttyq quramasynyń sapynda elimizdiń týyn jelbiretip júrgen 16 balýan (8-i er, 8-i áıel) synǵa túsedi.
«Samuryq Qazyna» ulttyq ál-aýqat qory» AQ jáne Sport Qory sportty qoldaý qorynyń demeýshilik qoldaýymen ótetin bási bıik dodanyń úzdikterine aqshalaı syılyqtar, medaldar men arnaıy dıplomdar tabystalady.
Olar:
Erler quramasy:
55 kg – Arhat Baımurzın
60 kg – Nurtilek Qarakesekov
66 kg – Nurǵalı Tursynǵazıev
74 kg – Tilek Toqtasynuly
82 kg – Asyljan Kárim
90 kg – Aıdar Beskempir
100 kg – Erqanat Moldaǵulov
+100 kg – Qaısar Shamshıdınov
Áıelder quramasy:
48 kg – Aıdana Hasenqyzy
52 kg – Saǵat Baıǵaraeva
56 kg – Aqnur Asylbekova
60 kg – Nazerke Asanhan
65 kg – Uldana Tańjaryqova
70 kg – Aqbota Qydyráli
77 kg – Arýjan Jandarbaı
+77 kg – Araılym Shegenova
Osy oraıda, qazaq kúresiniń Týrızm jáne sport mınıstrligi bekitken joǵary jetistikter sporty túrleriniń tizimine engenin atap ótken jón. Jańartylǵan tizimge Olımpıada, Paralımpıada, Sýrdlımpıada, Azııa jáne Azııa para oıyndarynyń baǵdarlamasyna engen 65 sport túri, sondaı-aq ulttyq sport túrleri engizilgen.
Sóıtip, qazaq kúresi — ulttyq maqtanyshymyz ári tarıhı muramyz retinde basym sport túrleriniń qatarynan oryn alyp, olımpıadalyq sport túrlerimen terezesi teńesti.
Esterińizge sala keteıik, osyǵan deıin qazaq kúresinen eresekter arasyndaǵy Qazaqstan kýbogy máresine jetkenin jazǵan bolatynbyz.