Túrkistan oblysynyń Túlkibas aýdanynda jumyssyzdyq deńgeıin tómendetýge basymdyq beriledi
TÚRKІSTAN. KAZINFORM - Túrkistan oblysynyń ákimi Darhan Satybaldynyń tóraǵalyǵymen aýdan, qalalardyń damý josparyn talqylap, bekitý jumystary jalǵasyp jatyr. Búgin Túlkibas aýdanynyń ákimi Nurjan Іztileýov aýdannyń 2025-2030 jyldarǵa arnalǵan «Ekonomıkalyq ósýdi qamtamasyz etý boıynsha» strategııalyq bastamalardy júzege asyratyn jol kartasynyń negizgi baǵyttary men kórsetkishterin baıandady.
Damý tujyrymdamalaryna qatysty ekonomıka, aýyl sharýashylyǵy, kásipkerlik, týrızm salalaryn damytyp, jumyspen qamtý úshin tıisti basqarma basshylarynyń usynystary qaraldy. Oblys ákimi aımaqty damytý boıynsha naqty tapsyrmalar berdi. Zaýyt, fabrıkalar ashýǵa kúsh salýdy, turalap qalǵan óndiris oryndaryn qaıta jandandyrýdy tapsyrdy.
«Ár aýdandy damytýda barlyq múmkindikti paıdalanǵan durys. Basty talap – aýyldy kóterý kerek. Damytyp, kórkeıtý kerek. Halyqtyń áleýmettik jaǵdaıyn jaqsartý úshin júıeli túrde jumys júrgizgen durys. Alda atqarylar jumystardyń naqty jospary bekitilip, sol jumysty kúsheıtý qajet. Túlkibas aýdanynda da jumystardy shıratý kerek. Jańa jobalar jetkiliksiz. Áli de tıisti deńgeıde emes. Jumys barysynda júıeli ustanym bolýy qajet. Infraqurylymy damyǵan bul aımaqqa kásipkerler umtylatyndaı jaǵdaı jasalýy tıis. Ol úshin ákim ishki jáne syrtqy ınvestıtsııalardy tartýda úzdiksiz jumys isteýi kerek. Tabıǵaty qolaıly aımaqta áli kúnge týrısterdi tartatyn jobalar jetkiliksiz», – dedi Darhan Satybaldy.
Aýdan ákiminiń baıandaýynsha, Túlkibas aýdanyn damytý úshin aýyl sharýashylyǵy, ónerkásip, kásipkerlik jáne týrızm baǵytynda jumys atqarylady. Ol úshin ınvestıtsııa tartyp, jańa tehnologııalardy endire otyryp ónimdilikti arttyrý, jumyssyzdyq deńgeıin tómendetý basym baǵyt retinde tańdalyp otyr.
Ótken jyldyń qorytyndysymen jalpy óńirlik ónim 99,5 mlrd teńgege jetken. 20 mlrd teńge ınvestıtsııa tartylǵan, bıyl onyń kólemin 35,8 mlrd teńgege deıin arttyrý josparlanǵan. 2024 jyl 8 aıdyń qorytyndysymen ónerkásip óniminiń kólemi 11,3 mlrd teńgeni boldy.
2030 jylǵa deıin 400 mlrd teńgeden asatyn 100-ge jýyq jańa joba júzege asyp, 3 myńnan astam jumys orny ashylmaq. Ónerkásipti damytý úshin jalpy ınvestıtsııalyq quny 327,2 mlrd teńge bolatyn 13 jobany iske asyrý josparlanyp otyr. 2 myńnan astam jańa jumys orny ashylmaq. Aýyl sharýashylyq salasynda ınvestıtsııalyq quny 29,6 mlrd teńge bolatyn 14 jobany iske asyryp, ónim kólemin 158,3 mlrd teńgege deıin jetkizý josparlanǵan.
Túlkibas aýdanynda «Beibars Bottlers» JShS aýyz sý jáne túrli tústi sýsyndar óndiristik zaýyty iske qosylady. Sondaı-aq un dıirmeni, konservi zaýytyn qaıta qurylymdaý, kontsentrat jáne shyryn quıý tsehy, kirpish zaýyty, kaýstıkalyq soda, PVH, kaltsıı karbıdi, ák óndirý, qýattylyǵy jylyna 4 myń tonnalyq jemis óndeý tsehy óz jumysyn bastamaq.
«Túlkibas» ındýstrıaldy aımaǵynyń aýmaǵynda qus fabrıkasynyń, balyqty kirpish zaýyty, qýattylyǵy 320 MVt gaz týrbınaly elektr stantsııasynyń qurylysy josparlanǵan.
Qarqyndy alma baý, balyq sharýashylyǵy, jemis-jıdekterin qaıta óńdeý, qurama jem óndirý zaýyty, sútti baǵyttaǵy asyl tuqymdy iri qara mal sharýashylyǵy salasynda jańa jobalar josparlanǵan.
