Túrkistan oblysynyń dıqandary qyryqqabattyń alǵashqy ónimin jınaı bastady

ASTANA. KAZINFORM — Túrkistan oblysynyń Jetisaı jáne Maqtaaral aýdandarynyń dıqandary qyryqqabattyń alǵashqy ónimin jınaı bastady. Sharýalar sýarmaly sýdy ýaqytyly jetkizgeni úshin Sý resýrstary jáne ırrıgatsııa mınıstrligine alǵys bildirip jatyr. Bul týraly vedomstvonyń baspasóz qyzmeti málim etti.

Bıyl qyryqqabattyń alǵashqy ónimi 45 kúnde pisip-jetildi. Qazirgi ýaqytta jergilikti sharýalar jınalǵan ónimdi satýǵa shyǵarýǵa daıyndap jatyr.

– Bıyl shamamen 10 gektar jerge egin ektik. Qyryqqabat pen qaýyn ósirip jatyrmyz. Tájirıbe retinde 4 gektar alqapqa tamshylatyp sýarý júıesin ornattyq. Ónim jaqsy. Sol sebepti sý únemdeý júıelerin aldaǵy ýaqytta da engizýdi josparlap otyrmyz. Sondaı-aq sýbsıdııa alýǵa ótinish beremin. Bıyl «Qazsýsharmen» kelisimshart jasadyq, sonyń arqasynda sý ýaqytyly kelip jatyr,– dedi Jetisaı aýdanynyń dıqany Ermahan Tasov.

Sý resýrstary jáne ırrıgatsııa mınıstrligine qarasty «Qazsýshar» RMK Túrkistan fılıaly oblys pen Shymkent qalasyndaǵy 330 myń gektardan astam sýarmaly jerge sý jetkizedi. Onyń 60 myń gektarǵa jýyǵy baý-baqsha alqaby.

Eske sala keteıik, sharýalardy zamanaýı sýarý júıelerine kóshirýdi yntalandyrý maqsatynda mınıstrlik uńǵyma burǵylaý, ınfraqurylym tartý jáne sý únemdeý jabdyqtaryn satyp alýǵa jumsalatyn shyǵyndardy óteý úlesin 50%-dan 80%-ǵa deıin ulǵaıtty. Sonymen qatar sýarmaly sýǵa saralanǵan tarıf engizildi: sý únemdeý tehnologııalaryn paıdalanatyn sharýalar úshin sýarmaly sý qunyn sýbsıdııalaý kólemi 60%-dan 85%-ǵa deıin artty.

Aıta keteıik, buǵan deıin túrkistandyq dıqandar Reseıge erte pisetin qyryqqabat ónimin eksporttaǵanyn jazdyq.