Túrkistan oblysyndaǵy mektep murajaılarynda qundy jádigerler kóp
Túrkistan oblysyndaǵy mektepterde shaǵyn murajaılar ashylyp, qyzmet kórsete bastaǵanyna da biraz jyldyń júzi bolyp qaldy. Basty maqsat – oqýshylardyń tarıhı jádigerlerdi ustap kórýine múmkindik jasap, tanym-túsinigin arttyrý, dep habarlaıdy Kazinform.
Búginde mektep ishinen ashylǵan murajaılarda qundy jádigerler kóp. Olardyń ishinde ólkeniń tarıhynan syr shertetin, ári sırek kezdesetin eksponattar da bar.
Máselen Keles aýdanyna qarasty Júzimdik aýylynda ornalasqan Sh.Ýálıhanov atyndaǵy №31 jalpy orta bilim beretin mektebiniń tarıhı-arheologııalyq murajaıyna qoıylǵan zattardy kóp mýzeılerden kezdestire almaısyz.
Munda HÚІІІ-HІH ǵasyrlarǵa tıeseli aǵash shoqpar men ojaý, ejelgi qańly dáýirine tıeseli saz balshyqtan jasalǵan qumyralar men ydystar bar.
Sondaı-aq, sórelerge kóne monetalar men qoladan jasalǵan sháınek, kese sekildi turmystyq zattar qoıylǵan.
HÚ-HÚІ ǵasyrǵa tıeseli Balbal tasqa arnaıy burysh berilgen. Onyń ishinde qanshama jyldardan beri qoldanylyp kele jatqan dombyra men qobyz tur.
1353 jyly tastan jasalǵan qol dıirmenderdi de osy mektepten kezdestirýge bolady.
«Jalpy Júzimdik aýylynyń tarıhy tereń. Óńirde 1985-1986 jyldary arheologııalyq qazba jumystary júrgizilgen. Sol kezde tabylǵan jádigerler mektep janynan ashylǵan murajaıǵa ótkizilipti. Jalpy aýmaǵy – 68 sharshy metrdi quraıtyn murajaı eki bólmeden turady. Ekspozıtsııalyq bólmeniń aýmaǵy – 56 sharshy metr. Murajaıda jalpy 152 eksponat bar», - deıdi mektep dırektory Aqmaral Qambarova.
Ustazdardyń aıtýynsha qazirgi kezde de mektep aýlasynda, aýyl mańynda kóptegen jádigerlerdi kezdestirýge bolady.
Tipti, aǵash otyrǵyzbaq bolyp jer qazǵan oqýshylar qysh qumyralardyń qıyndylaryn taýyp alǵan.
Odan bólek, oınap júrip te kóptegen jádigerlerge kezikken.
«Tarıhshy mamandardyń qorytyndysyna sáıkes, osy aımaqtan tabylǵan tarıhı eksponattar bizdiń zamanymyzdyń I-XIII ǵasyrlardaǵy Qańly memleketi men Qarahan memleketi kezeńderine jatady. Murajaı jumysynyń negizgi maqsaty – oqýshylardyń tarıhı, ólketaný baǵytyndaǵy tanymyn arttyrý jáne olardy patrıottyq rýhta tárbıeleý», - deıdi Aqmaral Qambarova.
Al, Kentaý qalasyndaǵy Álııa Moldaǵulova atyndaǵy mektepte soǵys jyldarynda qoldanylǵan buıymdar kóp.
Sondaı-aq, bilim ordasy ornalasqan Búrgem aýylynyń tarıhy, aýyl irgesin kóterýge at salysqan azamattar, zeınetker ustazdar, halyqtyń tóltýma mádenıetinen syr sherter qolóner buıymdary qoıylǵan.
«Murajaıdaǵy áskerı zattar qoıylǵan aýmaqty «Máńgilik polk» buryshy dep atadyq. Onda aýyldan shyqqan soǵys jáne eńbek ardagerleriniń sýretterin ildik. Sondaı-aq, mektebimizge aty berilgen Álııa Moldaǵulovanyń úlken portreti bar. Ekinshi dúnıejúzilik soǵys kezinde qoldanylǵan áskerı kıimder men baılanys quraldary, Uly Jeńistiń 20,30,40,50 jyldyq jáne Keńes Odaǵy Qarýly Kúshteriniń 60, 70 jyldyq mereıtoılaryna oraı berilgen medaldar, sum soǵystyń shejiresinen syr sherter kitaptar qorymen jabdyqtaldy. Onyń kópshiligin Sankt-Peterbýrg qalasynan Sherhan Ábilov esimdi kınoakter jerlesimiz arnaıy jetkizip berdi», - deıdi mektep dırektory Gúljan Kadyrova.
Mektep murajaılary Arys qalasynda da ashylǵan.
Satırık S.Adambekov atyndaǵy jalpy bilim beretin mektep mýzeıinde ázilkeshtiń ómirine qatysty kóptegen málimetter alýǵa bolady.
Ózi qoldanǵan zattary men kıimderi de saqtaýly tur.
«Bizde jádiger kóp edi. Arys qalasyndaǵy áskerı qoıma jarylǵan sátte ondaǵy zattarymyz talan tarajǵa túsip ketti. Qazir qaıtadan qalpyna keltirip, tolyqtyryp jatyrmyz», - deıdi mektep dırektory Meıirkúl Asqarova.
Aıta keteıik, búginde Túrkistan oblysynda 1000 mektep bar.
Onyń ishinde 500-den asa bilim oshaǵynda mektep janynda murajaı jumys istep tur.
