Túrkistan oblysyndaǵy ákimder men memlekettik qyzmetshiler jumysqa ulttyq kıimmen keldi
TÚRKІSTAN. KAZINFORM – Elimizde áz-Naýryz meıramyn 10 kún boıy atap ótý josparlanǵan. Naýryznama onkúndigi aıasynda ár kún ulttyq qundylyqtarymyzdy dáripteýge baǵyttalyp, Túrkistan oblysynda da túrli taqyrypta is-sharalar ótip jatyr.
18 naýryz – Ulttyq kıim kúni. Qazaqtyń ulttyq kıimderin ulyqtaýǵa arnalǵan kúni Túrkistan oblysyndaǵy barlyq memlekettik qyzmetshiler jumysqa ulttyq kıimmen keldi. Oblys ákiminiń apparaty jáne basqarmalardyń, aýdan, qala ákimdikteriniń qyzmetkerleri men kommýnaldyq memlekettik mekeme mamandary da atalǵan bastamany qýana qoldady.
El tarıhy men ult mádenıetiniń ajyramas bóligine aınalǵan ulttyq kıimdi nasıhattaý – árbirimizdiń mindetimiz.
Aıta keteıik, Túrkistan oblysynda 23 naýryzǵa deıin Ulystyń uly kúnine arnalǵan merekelik sharalar kúndelikti jalǵasady. Al, búgin saǵat 16:00-de «Kerýen saraı» týrıstik kesheninde Túrkistan oblysyndaǵy týrıstik maýsymnyń saltanatty ashylýy ótedi. Túrkistannyń Túrki áleminiń 2024 jylǵy týrıstik astanasy atanǵanyna baılanysty is-sharalar legi bastalady.
