Túrkistan oblysyndaǵy 852 eldi mekendi kógaldandyrýǵa 4 mıllıonnan astam kóshet egiledi
TÚRKІSTAN. KAZINFORM — Bıylǵy kóktemde óńirde 500 myńnan asa kóshet otyrǵyzylady.
«Túrkistan oblysynyń eldi mekenderin kógaldandyrýdyń 2022-2024 jyldarǵa arnalǵan is-shara jospary» bekitilgen bolatyn. Atalǵan jospar aıasynda óńirdegi 852 eldi mekenniń shamamen 90% kógaldandyrý úshin 4 mıllıonnan astam kóshet egý josparlanyp otyr.
Jospar boıynsha 2022 jyly — 251 685 dana, 2023 jyldyń kóktem aılarynda — 532 682 dana jáne kúz aılarynda 556 262 dana ártúrli kóshetter otyrǵyzyldy. Al, bıylǵy kóktemde óńirde 500 myńnan astam kóshet egilmekshi.
Sonymen qatar, oblys ákimi Darhan Satybaldy ózge elderdiń tájirıbesin paıdalana otyryp, zamanaýı tuqymbaq ashýdy tapsyrǵan bolatyn. Búgingi tańda bul baǵytta da tıisti jumystar atqarylýda. Máselen, oblystaǵy zamanýı tuqymbaqty «Jasyl aımaq» KMM-niń bazasynda ashý josparlanyp otyr. Qazirgi tańda tuqymbaqqa arnalǵan jerler naqtylanyp, memlekettik akt alý jumystary júrgizilip jatyr. Odan bólek, qalǵan orman sharýashylyǵy mekemelerinde qosymsha zamanýı tuqymbaq buryshtary ashylady.
«Qazirgi tańda aýdan, qala ákimdikterine jergilikti ónimdiligi joǵary kóshet túrleri men gúldi aǵashtardy bosatý jumystary júrgizilip jatyr. 2023 jyly aýdan, qala ákimdikterine jalpy 1 mıllıonnan astam kóshet, onyń ishinde 101 573 dana gúldi aǵashtar egildi. Bıylǵy jyldyń kóktem aılarynda josparǵa sáıkes 522935 dana kóshet egiledi dep josparlanyp otyr. Onyń ishinde gúldi aǵashtardyń 5500 túbi ázirlenip, aýdan, qalaǵa úlestirýge daıyn tur», — dedi oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Qaırat Abdýalıev.
