Túrkistan oblysynda jylý maýsymy qashan aıaqtalady

TÚRKІSTAN. KAZINFORM – Túrkistan oblysynda 2025-2026 jylǵy jylytý maýsymy shtattyq rejımde ótip jatyr.

Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, óńirde aýa temperatýrasy jylytý kezeńi barysynda turaqty deńgeıde saqtalǵan.

Qazirgi tańda oblysta 1 jylý-energo ortalyǵy, 36 ortalyqtandyrylǵan jáne 2 083 avtonomdy qazandyq qalypty jumys istep tur. Nátıjesinde 1 297 bilim berý, 685 densaýlyq saqtaý, 685 mádenıet, 7 jumyspen qamtý, 73 sport nysany jáne 737 kópqabatty turǵyn úı jylýmen tolyq qamtamasyz etilgen.

Sondaı-aq, osy qysta bıýdjettik mekemeler, turǵyndar jáne jylyjaılar qajetti kómirmen tolyq qamtyldy. Bul maqsatta 580 myń tonnadan asa kómir ázirlendi.

Vedomstvo málimetinshe, oblystaǵy jylytý maýsymy turaqty baqylaýda.

– Syrtqy aýanyń ortasha táýliktik temperatýrasy bes kún qatarynan +8°C jáne odan joǵary bolǵan jaǵdaıda nemese kúrt jylyný boljansa, aýdan jáne qala ákimderi arnaıy ókimmen jylytý maýsymyn aıaqtaý týraly sheshim qabyldaıdy. Osyǵan baılanysty óńirde jylytý maýsymyn 1-15 sáýir aralyǵynda aıaqtaý josparlanyp otyr, – delingen habarlamada.

Budan buryn Túrkistan oblysynda kommýnaldyq kásiporyn jylý tarıfin birneshe ese negizsiz kótergenin jazǵan edik.