Túrkistan oblysynda «Jaıly mektep» qurylysyn jospardan keshiktirgender eskertý aldy
TÚRKІSTAN. KAZINFORM — Túrkistan oblysynda «Jaıly mektep» ulttyq jobasy aıasynda 3 úsh jyl ishinde 63 mektep salý josparlanǵan. Búginde óńirde jyl sońyna deıin paıdalanýǵa beriletin 29 mekteptiń qurylysy júrip jatyr. Jobaǵa qatysty abattandyrý jáne joldardyń qurylystary da der kezinde aıaqtalýy tıis.
Búgin bilim nysandarynyń qurylysyndaǵy problemalar talqylandy. Máselen, mektep qurylysyn jospardan keshiktirip jatqan qurylys kompanııalarynyń ókilderi jumys barysyndaǵy kedergilerdi túsindirdi. Biri qurylys materıaldarynyń baǵasy sharyqtap, jetkizý merziminiń sozylýyn alǵa tartsa, endi biri jumys qolynyń jetkiliksizdigin aıtty. Taǵy biri saraptama qorytyndylarynyń merziminiń sozylýyn atady. Oblys ákimi jaýapsyzdyq tanytqandarǵa shara qaralatynyn eskertti.
«Bul — tarıhta bolmaǵan joba. Onyń oryndalýy — bárimizge syn. Sondyqtan moıyndaryńyzǵa alǵan jaýapkershilikti sezinip, jumysty merziminde jáne sapaly aıaqtaýǵa bar kúshterińizdi salyńyzdar. Ártúrli syltaý, bos sóz aıtyp, balanyń tirligin jasaýdyń qajeti joq. „Kótere almaıtyn shoqpardy belińe baılama!“ degen, endi aqtalý artyq. Ár nárseniń suraýy bar. Bitirińizder, bitti. Sizderden basqa suraý joq. Kedergiler bolsa, der kezinde kóterý kerek. Merzimderdiń buzylýyna eshqandaı jol berýge bolmaıdy. Bul rette jumystardyń sapasy aqsamaýy tıis. Olaı bolmaǵan jaǵdaıda jaýapty tulǵalarǵa sharalar qoldanylatyn bolady», - dedi Darhan Satybaldy.
«Jaıly mektep» ulttyq jobasy 2023-2025 jyldar aralyǵynda iske asyrylady. Aýqymdy joba elimizdegi mektep tapshylyǵy men úsh aýysymda oqytý máselesin joıý maqsatynda júzege asyp jatyr. Buǵan demografııalyq ósim men mektepterdiń eskirýi sebep bolyp otyr.
Qurylysy biryńǵaı standart boıynsha júrgiziletin oqý nysandary jıhazben, zamanaýı quraldarmen jabdyqtalady. Bastaýysh jáne joǵary synyptar úshin oqý kabınetteri jáne sport zaldary bar jeke bloktar qarastyrylǵan. Oǵan qosa, joǵary deńgeıdegi qaýipsizdik sharalarymen qamtamasyz etilmek. Mektepterdiń ishki jabdyǵyn qamtamasyz etýde otandyq óndiristi tartý kózdelgen.
