Túrkistan oblysynda janar-jaǵarmaı beketi órtendi

TÚRKІSTAN. KAZINFORM – Áleýmettik jelilerde Túrkistan oblysy Saıram aýdanynda jol boıyndaǵy janarmaı quıý beketiniń órtenip jatqan beınejazbasy tarady.

Túrkistan oblystyq Tótenshe jaǵdaılar departamentiniń málimetinshe, órt Saıram aýdanyna qarasty Qarasý aýylyndaǵy «Aqsý-Qarabulaq» tas jolynyń boıynda ornalasqan janar-jaǵarmaı quıý beketinen shyqqan.

Aldymen júk kóligi órtenip, odan keıin jalyn janarmaı quıý beketi ǵımaratynyń shatyryna jaıylǵan.

- 2025 jyly 16 qarasha kúni saǵat 16:44-te Saıram aýdany, Qarasý aýyly, Qarabulaq tas joly janar-jaǵarmaı beketiniń jalpy kólemi 150 sharshy metr ǵımaratynyń tóbe jappasy jandy. Órt saǵat 17:04-de oqshaýlanyp, saǵat 17:23-de tolyq sóndirildi. Zardap shekkender joq, - delingen oblystyq Tótenshe jaǵdaılar departamentiniń resmı habarlamasynda.

Oqıǵa ornyna Tótenshe jaǵdaılar departamentinen 40 qutqarýshy men 9 tehnıka, 103 qyzmetiniń toby (3 qyzmetker jáne 1 tehnıka) jáne «Ońtústik jaryq tranzıt» JShS mamandary (3 adam jáne 1 tehnıka) jumyldyryldy.

Osyǵan deıin Qostanaı qalasy Oral kóshesinde ornalasqan jeke turǵan angardyń órti sóndirilip jatqany týraly habarladyq.