Túrkistan oblysynda jańa oqý jylynda qansha mektep ashylady
TÚRKІSTAN. KAZINFORM — Óńirde 115 mektepti qamtıtyn renovatsııalyq joba iske asyp jatyr.
Bilim sapasyn arttyrýǵa jáne bilim berý ınfraqurylymyn jaqsartýǵa baǵyttalǵan bul aýqymdy joba 2025–2027 jyldar aralyǵynda kezeń-kezeńimen júzege asady. Joba aıasynda bıyl 41 mektepke kúrdeli jóndeý jumystary bastaldy. Al 2025 jyly — 38, 2027 jyly — 36 mektepti jańǵyrtý kózdelgen.
Qazirgi tańda 41 mekteptiń 40-ynda bekitilgen óndiristik kestege saı jumystar júrgizilip jatyr. Bıylǵy jyly 6 mektep kúrdeli jóndeýden, 15 mektep aǵymdaǵy jóndeýden ótip, paıdalanýǵa beriledi. Qalǵan 20 nysan — 2026 jylǵa ótpeli retinde josparlanǵan.
Jańǵyrtýǵa ilikken bilim oshaqtarynyń basym kópshiligi — aýyldyq eldi mekenderde ornalasqan, 30-40 jyldan astam ýaqyt buryn salynǵan mektepter. Bul bastama aýyl men qala mektepteri arasyndaǵy ınfraqurylymdyq teńsizdikti joıýǵa, oqýshylar men muǵalimderge qolaıly orta qalyptastyrýǵa múmkindik beredi.
Búginde oblystaǵy memlekettik mektepterdiń 798-i tıptik, 124-i yńǵaılastyrylǵan ǵımaratta ornalasqan. Sonymen qatar, oblystyq bıýdjet esebinen bıylǵy jyly 17 bilim berý nysanynyń qurylysy júrgizilip jatyr. Onyń ishinde 11 mektep, 1 jataqhana, 5 qosymsha bilim berý uıymy bar.
Atalǵan nysandardyń tórteýi bıyl paıdalanýǵa berilmek. Qalǵan 13 nysan 2026 jylǵa ótpeli joba retinde qarastyrylǵan.
«Keleshek mektep» ulttyq jobasy aıasynda Túrkistan oblysynda 22 900 oryndyq 29 mekteptiń qurylysy josparlanǵan. Onyń ishinde 2024 jyly — 13 mektep paıdalanýǵa berilse, 2025 jyly — 16 mektep iske qosylmaq.
Atalǵan 29 mekteptiń ınjenerlik ınfraqurylymy 100% qamtamasyz etilgen. 23 mektepte kirme joldar tolyqtaı salynyp bitse, 6 mektepte aýyr tehnıka jumystary aıaqtalǵan soń jol tóseý bastalady.
2024 jyly qurylysy aıaqtalǵan 13 mekteptiń 12-si oblystyq menshikke berildi, onyń ishinde 9 mektepte oqý protsesi bastalǵan, al 4 mektepte oqý qyrkúıek aıynda bastalmaq. 2025 jyly paıdalanýǵa beriletin 16 mekteptiń 3-eýinde qurylys aıaqtalýǵa jaqyn, 8 mekteptiń jumysy 90%-ǵa, 5 mekteptiń jumysy 70%-ǵa oryndalǵan.
Jalpy 2024-2025 oqý jylynda óńirde 1093 mektep oqýshylardy qabyldaıdy. Onyń ishinde 922 — memlekettik bolsa, 171 — jekemenshik. Bıylǵy jyly keleshek mektepter men jańa qurylystar esebinen memlekettik mektepter jelisi 935 ulǵaıady dep jasparlanǵan. Jańa oqý jylynda jobamen 1-11 synyptarda 568 myńǵa jýyq oqýshy bilim alady dep kútilip otyr. Al, 1-synypqa 48 000 astam oqýshyny qabyldanbaq.
Aıta keteıik, budan buryn Túrkistan mektepterine «aqyldy» júıe engizilip jatyr.