Túrkistan oblysynda túıe kóteretin palýan turady
TÚRKІSTAN. KAZINFORM - Ol 400 kelige jýyq zatty ıyǵyna salyp alyp, erkin otyryp-turady.
Saıram aýdanyna qarasty Oımaýyt aýylynyń turǵyny Birjan Saǵadatulyn jerlesteri «Bórte» dep ataıdy. Bul – onyń kókparǵa degen qyzyǵýshylyǵyna berilgen esim. Sondaı-aq kúsh atasy Qajymuqannyń izbasary sanaıtyndar da bar. Sebebi Birjan jas bolsa da alyp kúshke ıe. Kólik súırep, qoshqar kóteredi. Tipti, 350-380 kelilik túıeni ıyǵyna salyp, qınalmaı alǵa qaraı qadamdaıdy.
- Arnaıy jattyǵý jasap daıyndalǵan joqpyn. Sport zalǵa baryp, shynyqqan emespin. Boıymda Allanyń bergen kúshi bar. Birden aýyr da, alyp zattardy kóterip kete beremin, - deıdi ol.
Jas jigit alyp kúshke ıe bolý qasıetin atasy Jaqypbekten daryǵan dep biledi. Ol da jigit shaǵynda kúshtiligimen talaıdy tamsandyrǵan. Kóliktiń matoryn bir ózi kóterip alǵan sátterine kýá bolǵan jerlesteri kóp. Birjan sol atasyna qarap ósti. Tálimi men tárbıesin aldy. Bala kezinde qozy, laqty erkin kóteretin bolǵan. Bertin kele, qoı, qoshqardy ıyǵyna salyp, júre beretin kúshke ıe boldy. Qazir túıe kóteretin palýan atanyp otyr.
Áleýmettik jelide Birjannyń birneshe vıdeosy kópshilikke keńinen tarap ketti. Onda alyp kúsh ıesi esektiń ústinde otyrǵan balany erkin kóterip alady. Jeńil kóliktiń astynan ustap, jyljytady. Túıeni ıyǵyna salyp alyp, adymdap júredi. Úlken tasty keýdesine qysyp alyp, júgiredi. Jelide jarııalanǵan bul vıdeolar, oqyrmandardyń qyzyǵýshylyǵyn týdyrdy. Sondyqtan jaqsy pikirler jazyp, sáttilik tilegen jandar kóp.
- Alyptar saıysynan arnaıy júldege ıe boldym. Aldaǵy ýaqytta da túrli básekelerge qatysyp qazaq eliniń týyn kókke kótersem deımin. Osy maqsatta Astanaǵa baryp, aýyr atletıkamen shuǵyldanýdy oılap júrmin. Jalpy, qoldaý bolsa túbegeıli sportqa aýysýǵa bolady, - deıdi palýan.
Birjannyń boıy 1,83 metr, al salmaǵy 110 kelige jýyq. Palýan tamaq talǵamaıdy. Ásirese, et, nan salma sekildi asty súısinip jeıdi. «Kúshti bolý úshin, kóp tamaq ishý kerek» dep biledi. Al hobbıi – kókpar.
- Qyzýqandy qazaqpyz goı. At dese delebemiz qozyp turady. Atqa minip, kókpar shabýǵa qyzyǵamyn. Túrkistan oblysy men Shymkent qalasynyń atynan shyǵyp, kóptegen júldege ıe boldyq. Ózim de úıde jylqy ustaımyn. «Aqylteke» atty parodalyq jylqym bar. Biraq ol kókpar shabýǵa jaramaıdy, - deıdi palýan.
Birjan Qýanysh 2000 jyly dúnıege kelgen. Oımaýyt aýylyndaǵy Tóle bı atyndaǵy mektepte saýat ashyp, 11 jyl boıy bilim aldy. Sodan Agrarlyq kolledjde oqyp, veterınar mamandyǵyn meńgerdi. Búginde 25 jastaǵy jas jigit aýylda mal dárigeri bolyp qyzmet atqaryp keledi.
- Bala kúnimizde arman kóp boldy goı. Degenmen ómir aǵysy basqa arnaǵa buryp áketti. Qazir óz mamandyǵymdy qatty jaqsy kóremin. Halyqqa qyzmet etip, jerlesterimniń alǵysyna bólenip jurmin, - deıdi ol.
Aıta keteıik, budan buryn Túrkistanda jastar muqtaj otbasylarǵa jyl saıyn úı salyp beretinin jazǵan bolatynbyz.