Túrkistan oblysynda óńirlik koalıtsııa quryldy
TÚRKІSTAN. KAZINFORM – Búgin Túrkistan oblysynda «Ádiletti jáne Progressıvti Qazaqstannyń Halyqtyq Konstıtýtsııasy úshin!» óńirlik koalıtsııasy quryldy.
Bul konstıtýtsııalyq reformalardy qoldaý jáne halyqqa keńinen túsindirý baǵytyndaǵy júıeli jumystyń mańyzdy kezeńi. Óńirlik koalıtsııa quramyna 5 saıası partııanyń oblystyq fılıaldary, bedeldi qoǵam qaıratkerleri, tájirıbeli zańgerler, máslıhat depýtattary, ǵylymı jáne shyǵarmashylyq zııaly qaýym ókilderi, sarapshylar endi. Quramǵa engen 457 adam barlyq aýdan qalalarda, halyqtyń barlyq sanatymen 1959 kezdesýler ótkizip, konstıtýtsııalyq reformalar aıasyndaǵy jańa quqyqtyq normalardy túsindiretin bolady.
Oblysta 1 mıllıon 195 myńnan astam saılaýshy tirkelgen. Aldaǵy referendýmdy qoldaý jáne úılestirý maqsatynda partııa fılıaldary janynan 18 óńirlik koalıtsııa qurylǵan. Quramyna «AMANAT», Aýyl, Aq jol, Qazaqstan Halyqtyq partııasy jáne Respublica partııalarynyń ókilderi endi.
Jıyndy ashqan «AMANAT» partııasy Túrkistan oblystyq fılıalynyń tóraǵasy, oblystyq máslıhattaǵy partııalyq fraktsııa jetekshisi, óńirlik koalıtsııa tóraǵasynyń orynbasary Altynsary Úmbetálıev Jalpyulttyq koalıtsııanyń qurylýy qoǵamdy ortaq maqsat jolynda toptastyrýdyń aıqyn kórinisi ekenin jetkizdi.
— Jańa Konstıtýtsııa eldiń turaqty damýyna serpin beretin strategııalyq qujat. Onda azamattardyń quqyqtaryn qorǵaý, ádildik qaǵıdattaryn ornyqtyrý jáne memlekettik basqarý júıesin jetildirý kózdelgen. Bizdiń mindet — osy ózgeristerdiń mánin halyqqa naqty ári túsinikti jetkizý, — dedi Altynsary Dúısenbekuly.
— Elordada elimizdiń jetekshi qoǵamdyq-saıası kúshteri Jalpyulttyq koalıtsııa aıasynda birikkeni — qoǵamnyń jańa Konstıtýtsııaǵa degen jaýapkershiligin kórsetedi. Bul qujat tek quqyqtyq reforma ǵana emes, ol memleket damýynyń jańa sapalyq kezeńine ótýge baǵyttalǵan. Zań ústemdigi, ádildik jáne azamattardyń quqyqtaryn qorǵaý onyń negizgi tirekteri, — dep atap ótti «AMANAT» partııasy Túrkistan oblystyq fılıaly atqarýshy hatshysynyń orynbasary, óńirlik koalıtsııa tóraǵasynyń orynbasary Qalyıma Jantóreeva.
Túrkistan oblystyq máslıhatynyń tóraǵasy, óńirlik koalıtsııa tóraǵasynyń orynbasary, Konstıtýtsııalyq reforma jónindegi keńes múshesi Nuraly Ábishov jańa Konstıtýtsııa jobasynyń usynylýy eldiń saıası jáne quqyqtyq damýynyń jańa kezeńin aıqyndap bergenin, bul tarıhı sheshim ekeni jetkizdi.
— Aldaǵy negizgi jumys reformalardyń mazmunyn halyqqa jan-jaqty túsindirý. Ár azamat onyń mańyzyn tereń uǵynýy tıis, — dep atap ótti.
Odan soń, shtab músheleri Qazaqstan Halyqtyq partııasy Túrkistan oblystyq fılıaly tóraǵasynyń orynbasary Iskak Ahmetov, Halyqaralyq týrızm jáne meımandostyq ýnıversıtetiniń professory Sábıt Baımahambetov bul reformalar uzaq jyldar boıy pisip-jetilgen qoǵamdyq suranystyń nátıjesi, básekege qabiletti, zamanaýı memleket qurýdyń negizi ekenine toqtaldy.
Óńirlik koalıtsııanyń qurylýy konstıtýtsııalyq reformalardy keńinen nasıhattaý men túsindirýdiń tıimdi tetigi. Aldaǵy kezeńde koalıtsııa músheleri halyqpen ashyq dıalog júrgizip, jańa quqyqtyq normalardyń máni men mazmunyn júıeli túrde túsindirý jumystaryn jalǵastyrady.