Túrkistan oblysynda mektepterdegi problemaǵa qatysty prokýratýra is qozǵady
ASTANA. KAZINFORM – QR Bala quqyqtary jónindegi ýákil Dınara Zakıevanyń málimdemesinen keıin Túrkistan oblysynyń prokýratýrasy óńirdegi mektepterde bolǵan problemaǵa áreket etti.
Aıta keteıik, D. Zakıeva buǵan deıin Túrkistan oblysyndaǵy mektepterde býllıng, erte júktilik jáne óz-ózine qol jumsaý faktilerin aıtqan bolatyn. Sonymen qatar ol áleýmettik qyzmetkerler men kámeletke tolmaǵandar isi jónindegi ınspektorlar problemalardy elemeı júrgenin aıtty.
Búgin Májilistiń jalpy otyrysynan keıin tilshiler QR Bas prokýrorynyń orynbasary Ǵalymjan Qoıgeldıevten osy derekterdi tekserý múmkindigi týraly surady.
«Bul málimetterdi oqydym. Bul másele Túrkistan oblysy prokýratýrasynyń baqylaýynda tur. Meniń bilýimshe, is qozǵaldy. Barlyǵy sotqa deıingi tekserý satysynda», - dedi Ǵ. Qoıgeldıev.
Budan buryn habarlanǵandaı, QR Bala quqyqtary jónindegi ýákil Dınara Zakıeva Instagram jelisindegi paraqshasynda Soltústik Qazaqstanda túrli jaraqatpen aýrýhanaǵa túsken tórt jasar balaǵa qatysty jańa málimet jarııalady.
