Túrkistan oblysynda qurylǵan ındýstrıaldy aımaqtar óńirdiń damýyna oń serpin beredi
TÚRKІSTAN. KAZINFORM - Túrkistan óńirinde sońǵy bir aıdyń ishinde Qazyǵurt, Saýran, Saryaǵash jáne Keles aýdanynda 570 gektarǵa qosymsha 4 ındýstrıaldy aımaq quryldy. Bul týraly búgin oblys ákimi Darhan Satybaldynyń tóraǵalyǵymen ótken apparat májilisinde aıtyldy.
Májilis barysynda ındýstrıaldy aımaqtardy jobalarmen tolyqtyrý jaıy talqylandy. Óńir basshysy jaýaptylarǵa bul baǵyttaǵy jumysty kúsheıtýdi tapsyrdy.
«Kásipkerlik jaǵynan jáne sý máselesi boıynsha aýda, qala ákimderi de esebin daıyndasyn. Óz aýmaqtaryńyzdaǵy ındýstrıaldy aımaqtyń ınfraqurylym máselesin de birlese otyryp, ońtaıly sheshý qajet. Jan-jaqty izdenip, óńirdiń damýy úshin erekshe jobalardy júıeli túrde júzege asyryńyzdar», – dedi oblys ákimi Darhan Satybaldy.
Oblystyq kásipkerlik jáne ónerkásip basqarmasynyń basshysy Nurjigit Myrzahmetov jıyn barysynda baıandama jasap, atqarylǵan jumystarǵa toqtaldy. Sonymen qatar ınfraqurylymdyq alańdardy damytý boıynsha birqatar usynys joldady. Jalpy ındýstrıaldy aımaqtardyń ınfraqurylymyna bıýdjetten jumsalǵan qarjy 10 ese ınvestıtsııa tartýǵa múmkindik beredi deıdi basqarma basshysy. Sondaı-aq aýdan jáne qala ákimdikterimen birge ındýstrıaldy aımaqtarda senbilik jumystary uıymdastyrylyp turatynyn jetkizdi.
Jańa ındýstrıaldy aımaqtar óńirdiń damýyna oń serpin beredi. Sonyń biri Keles aýdany, Aqtóbe aýyldyq okrýginen, Jetisaı baǵytyndaǵy joldyń boıynan 300 gektar jerge «Keles» ındýstrıaldy aımaǵy quryldy. Infraqurylym núktelerin esepke ala otyryp, aýdan ákimdigi jer telemin de usynǵan. Al Túrkistan ındýstrıaldy aımaǵynan soǵylǵan 2 braýnfıldte búgingi tańda jıhaz óndirý tsehy jáne shulyq buıymdaryn óndirý tsey jumys istep otyr. Munda jergilikti turǵyndar jumyspen qamtylǵan.
Óńirde óndiristik park boıynsha 39 óndiristik ǵımaratty qurý josparlanǵan. 1-kezeń boıynsha 10 ǵımarat qurylysy aıaqtalyp, ınvestıtsııa somasyna 10 joba iske asyrylyp jatyr. Al 2-kezeń boıynsha 12 óndiristik ǵımarattyń qurylys jumystary bastaldy. Óndiris oryndarynda ornalasatyn ınvestıtsııalyq jobalar pýly jasaqtalyp, memorandýmdarǵa qol qoıyldy. 3-kezeń boıynsha 17 óndiristik ǵımarattyń qurylys jumystary da bastalǵan. Keıbiri kásipkerlerdiń esebinen de soǵylyp jatyr. Saýran aýdanynda Qarashyq, Shornaq, Iassy aýyldyq okrýgterinde jalpy kólemi 70 myń sharshy metr bolatyn 49 óndiristik ǵımarat salý jumystary bastaldy. Jobalardyń basym kópshiligi jıhaz óndirý salasynda. Munda da jańa jumys oryndary ashylyp, jergilikti turǵyndar turaqty jumysqa ornalasatyn bolady.
Indýstrıaldy aımaqtarmen qatar, jobalardy «TURAN» arnaıy ekonomıkalyq aımaǵyna tartý jumystary júrgizilip jatyr. Olardyń qatarynda, sheteldik kompanııanyń tekstıl klasteri, Polımerli qubyrlar, Taý-ken metallýrgııa keshenine arnalǵan qurylǵylar zaýyttary bar.
Aıta keteıik, búginde oblys kóleminde 594 gektardan turatyn 10 ındýstrıaldy aımaq bar. Onda quny 125,6 mlrd teńge bolatyn 87 joba júzege asyrylyp jatyr. Jobalardyń basym bóligi qurylys materıaldaryn óndirý, jeńil jáne jıhaz ónerkásibi salasynda jumyldyrylǵan. Al jańadan qurylǵan jumys oryndarynda, sol mańdaǵy jergilikti turǵyndar eńbek etip jatyr.
