Túrkistan oblysynda qasqyr men shıbóri toǵaıdaǵy maldarǵa shabýda
TÚRKІSTAN. KAZINFORM – Otyrar aýdanynyń turǵyndary tórt túligin toǵaıǵa shyǵara almaı otyr.
Sońǵy kezderi Otyrar aýdany aýmaǵynda qasqyr men shıbórilerdiń malǵa shabýy jıilip ketken. Ásirese, Aqqum, Kóksaraı, Maıaqum, Qoǵam, Talapty aýyldyq okrýgteriniń turǵyndary tórt túligin toǵaıǵa shyǵara almaı qalǵan. Sebebi, jyrtqyshtar tebinde jaıylatyn jylqylar men jeke sharýa qojalyqtaryndaǵy jas tólderdi jep ketip jatyr. Al, olardy atýǵa jergilikti turǵyndardyń ruqsaty joq.
«Qazir ańdardyń uıyǵatyn kezeńi. Kóbeıedi. El ishinde «Syrdyń boıyndaǵy toǵaılardy panalaǵan», «Ulttyq park aýmaǵyndaǵy júr» degen áńgimeler kóp. Al, qasqyrdy atýǵa arnaıy ruqsat kerek. Ulttyq park aýmaǵyna qarýmen múldem kirýge bolmaıdy. Ol úshin arnaıy resmı hat jazylyp, ruqsat alynýy kerek. Al, shıbóriler aýyldyń mańaıynda júr. Der kezinde qaýipsizdik sharalaryn qolǵa alý kerek dep oılaımyn», - deıdi «Syrdarııa-Túrkistan» memlekettik óńirlik tabıǵı parkiniń ınspektory Abzal Úsenhanuly.
Jýyrda Otyrar aýdanynyń ákimdiginde arnaıy jıyn ótip, túz taǵylarynan keler qaýip-qaterdiń aldyn alý máselesi qaraldy. Aýdandyq máslıhat tóraǵasy Ýalıhan Uzaqov dala jyrtqyshtarynyń sharýalarǵa keltirip jatqan zalaly aýdan turǵyndarymen kezdesý barysynda jıi aıtylatyn ózekti máseleniń birine aınalǵanyn aıtty.
Aýdan ákimi apparatynyń bas ınspektor-zańgeri Ashat Ámirhan dala jyrtqyshtaryn aýlaýdyń tártibi men qaǵıdalary týraly baıandama jasap, zańdylyǵyn túsindirdi.
Sondaı-aq, Otyrar orman jáne janýarlar dúnıesi qorǵaý mekemesi men «Syrdarııa-Túrkistan» memlekettik óńirlik tabıǵı parkiniń mamandary tıisti aýmaqtarda jabaıy ańdardy atýǵa tyıym salynǵan shekteýler jaıynda baıandady.
«Amanat» partııasy Otyrar aýdandyq fılıalynyń tóraǵasy Erkeǵalı Tańatarov búgingi tańda turǵyndardyń kún kórisindegi jalǵyz maly, keıbir azamattardyń nesıege alǵan tórt túligi túz taǵysynyń jemtigine aınalǵanyn, tipti shıbórilerdiń aýyl aralap júrýi, ıesiz júrgen qańǵybas ıtterdiń kóbeıýi turǵyndarǵa, balalarǵa qaýipti ekenin jetkizdi.
Jıynnyń qorytyndysyna sáıkes máslıhat pen partııa fılıaly jáne aýdan ákimdigi birlesken arnaıy jumys tobyn qurdy. Onda turǵyndar tarapynan aıtylǵan tıisti usynystar men shaǵymdar jınaqtalyp, ońtaıly sheshý máselesi qaralmaq.
