Túrkistan oblysynda kapsýlaly úıler men sendvıch-panel shyǵarylyp jatyr
TÚRKІSTAN. KAZINFORM – 2025 jyly Túrkistan oblysynyń ákimi Nuralhan Kósherov bastaǵan óńir delegatsııasy QHR-ǵa sapar jasap,«Shandong Kamoya» zaýytynyń jumysymen, óndiristik qýatymen jáne ınnovatsııalyq sheshimderimen tanysyp, osy jobany júzege asyrý máselesin naqtylaǵan bolatyn. Sol kelisim naqty iske ulasyp, qazirgi ýaqytta Túrkistan oblysynda «KHAN TAU» brendimen kapsýlaly úıler shyǵarylyp jatyr.
Mundaı ǵımarattardy týrıstik keshender men glempıngter, modýldik keńseler men mobıldi úıler, kórme pavılondary, dala zerthanalary, qonaqúılerge paıdalanýǵa bolady.
Óńir basshysy Nuralhan Kósherov oblys ortalyǵy mańyndaǵy shaǵyn óndiristik parkke baryp, atalǵan óndiristiń jaı-kúıimen tanysty.
Kópshilikke málim, oblys ákimdiginiń tikeleı qoldaýymen salynǵan shaǵyn óndiristik parkte ınvestorlar úshin jańa ǵımarattar boı kótergen. Solardyń birinde «BNK Group» kompanııasy Qytaıdyń «SHANDONG CAMOVA WISDOM CULTURE TRAVEL» kompanııasymen birlesip, kapsýlaly ekoqonaqúılerdi jáne ózge de ınnovatsııalyq modýldik nysandardy qamtıtyn zamanaýı smart-qurylystar óndirisin iske qosqan.
Joba zamanaýı jobalaý jáne óndiris tehnologııalaryn qoldaný arqyly júzege asyrylýda. Bul bastama týrıstik, qalalyq jáne ınfraqurylymdyq salalarǵa arnalǵan energııa únemdeıtin, mobıldi ári kópfýnktsıonaldy sheshimder men daıyn bólmelerdi shyǵarýǵa múmkindik beredi.
Kásiporynnyń óndiristik qýaty jylyna 200 danaǵa deıin daıyn ónim shyǵarýǵa jetedi.
Atalǵan smart-qurylystardy ishki týrızmdi damytý, týrıstik klasterler qalyptastyrý, qalalyq ortany abattandyrý, sondaı-aq áleýmettik jáne ınfraqurylymdyq jobalardy iske asyrý maqsatynda paıdalanýǵa bolady.
Joba óńirde joǵary tehnologııalyq óndiristi damytýǵa, ınvestıtsııalar tartýǵa jáne zamanaýı qurylys sheshimderin engizýge baǵyttalǵan.
Sonymen birge «BNK Group» kompanııasy óz óndiristik bazasynda zamanaýı sendvıch-panelder shyǵarýdy jolǵa qoıdy. Joba aıasynda táýligine 1 000 sharshy metrge deıin daıyn ónim óndirýge múmkindik beretin joǵary tehnologııalyq óndiristik jeli iske qosyldy. Bul qurylys jáne ınfraqurylymdyq jobalardy sapaly qurylys materıaldarymen jedel qamtamasyz etýge jaǵdaı jasaıdy.
Óndiriletin sendvıch-panelder zamanaýı talaptarǵa tolyq saı keledi. Atap aıtqanda, zaýytta óndirilgen ónim jylý oqshaýlaý, energııa tıimdiligi, beriktik jáne uzaq merzimdilik, órt qaýipsizdigi kórsetkishteri boıynsha joǵary sapasymen erekshelenedi.
Óndiristiń iske qosylýy óńir úshin mańyzdy áleýmettik-ekonomıkalyq mánge ıe. Nátıjesinde 30-ǵa deıin turaqty jumys orny quryldy. Atalǵan joba jergilikti óndiristi damytýǵa, ımportty almastyrýǵa, sondaı-aq ónerkásiptik, azamattyq jáne agrarlyq qurylys salalaryndaǵy jobalardy qoljetimdi ári sapaly qurylys materıaldarymen qamtamasyz etýge baǵyttalǵan.
Atalǵan zaýyttar men óndiristik parktegi ǵımarattar qurylysyn qadaǵalaǵan oblys ákimi osy nysandarǵa jańa óndiris oryndaryn jedel ornalastyrý, jobalardy júzege asyrý baǵytyndaǵy jumystardy jandandyrýdy tapsyrdy.
Aıta keteıik, Túrkistan mańynda otandyq óndiristi damytý jáne qaıta óńdeýdi qoldaý maqsatynda 100 gektar aýmaqta «Shaǵyn ónerkásiptik park» jobasy iske asyrylýda. Joba aıasynda 152 ǵımarat salyp, 6 040 jumys ornyn qurý josparlanǵan. Jobanyń І kezeńinde 40 ǵımarat salynyp, 32 joba qosyldy. 1 220 jumys orny ashyldy. Nátıjesinde bıýdjettiń 1 teńgesine 8,5 teńge jeke ınvestıtsııa tartylǵan.
Jalpy, oblys boıynsha jalpy 21 shaǵyn óndiristik alań qurylyp, ǵımarattar salý boıynsha tıisti jumystar júrip jatyr. Negizgi baǵyttar retinde qurylys materıaldary, jıhaz, plastık jáne rezeńke, hımııa ónimderi óndiristeri men jeńil ónerkásip aıqyndaldy. Óndiristik park aýmaǵynda jıhaz, jańbyrlatyp sýǵarý, sýsyn, muzdatqysh jáne qurylys zattaryn, ózge de ónimder shyǵaratyn zaýyttar jumysyn bastap ketken.