Túrkistan oblysynda ınternet-alaıaqtarǵa urynǵandar 1,6 mlrd teńgesinen aıyrylǵan

TÚRKІSTAN. KAZINFORM — Oblysta ótken jyly ınternet-alaıaqtyqqa qatysty 843 qylmys deregi tirkelip, saldarynan jábirlenýshilerge 1 mlrd 665 mln teńgeden astam shyǵyn kelgen.

Óńirde qylmystyń bul túri jyldan jylǵa kóbeıip otyr. Statıstıkalyq derekterge súıensek, 2023 jyly ınternet-alaıaqtyqqa qatysty 567 qylmys tirkelgen. Al 2024 jyly 598 qylmys anyqtalyp, sol jyly jábirlenýshiler shamamen 1 mlrd teńge kóleminde shyǵynǵa ushyraǵan.

Oblystyq polıtsııa departamenti Kıberqylmysqa qarsy is-qımyl basqarmasy bastyǵynyń mindetin atqarýshy, polıtsııa maıory Ermek Shákimniń málimdeýinshe, tirkelgen ınternet-alaıaqtyq qylmystarynyń ishinde eń jıi kezdesetin tásil — bank qyzmetkeri, quqyq qorǵaý organdary, baılanys operatorlary men poshta qyzmetkerleri atynan qońyraý shalý.

Atalǵan ádis boıynsha ótken jyly 340 derek anyqtalǵan. Sondaı-aq ınvestıtsııa salý syltaýymen aldaý faktileri boıynsha 98 jaǵdaı tirkelgen.

— Al ınternet-dúkender men onlaın-platformalar arqyly taýar nemese qyzmet úshin aldyn ala tólem jasaý («Wildberries», «TEMU», «Kolesa», «Krysha», «OLX» jáne ózge de servıster) derekteri 255 jaǵdaıdy quraǵan. Budan bólek, messendjerler arqyly tanysynyń atynan aqsha suraý boıynsha 49 derek, utys oıyndaryna qatysty 47 derek jáne ınternet-alaıaqtyqtyń ózge de túrleri boıynsha 54 derek anyqtaldy, — dedi spıker.

Budan buryn habarlanǵandaı, ınternet alaıaqqa 32 mln teńge nesıe alyp bergen erli-zaıypty oqıǵasyn aıtyp berdi.