Túrkistan oblysynda egin egetin jerdiń 32 paıyzy sorlanyp ketken
TÚRKІSTAN. KAZINFORM — Óńirdegi sharýalar jyl saıyn egistik alqabynda sor shaıý jumystaryn júrgizedi.
Búginde Túrkistan oblysynda kóktemge daıyndyq jumystary bastalyp ketti. Erte qamdanǵan keı sharýalar qyryqqabat pen kartop, sábiz egip jatsa, endi biri egistik alqabyn bıylǵy eginge daıyndap jatyr.
Tańerteńnen qara keshke deıin jer jyrtyp, qopsytý, tegisteý, aryq ashyp, atyz tartý — ońtústik sharýalary úshin úırenshikti jaǵdaı. Sondaı-aq, sor shaıý isi de jyl saıynǵy dástúrge aınalyp barady.
Sebebi, jerasty sýynyń kóterilýinen egistik alqabyn sor men tuz basyp qalady. Al, ony shaıyp tastamasa egin óspeı qalýy múmkin.
Túrkistan oblysynyń aýyl sharýashylyǵy basqarmasy usynǵan aqparatqa súıensek, óńirde aýyl sharýashylyǵy maqsatynda qoldanylatyn 870 myń ga jer bar.
Onyń ishinde 32 paıyzyn sor basqan.
— Az ǵana sorlanǵan 76,5 myń ga, ortasha — 63,6 myń ga, qatty sorlanǵan 42,4 myń ga jer bar. Aýdandar boıynsha Shardara aýdanynda — 68 myń ga, Ordabasy aýdanynda — 24,1 myń ga, Saýran aýdanynda — 70,8 myń ga, Otyrar aýdanynda — 48 myń ga, Arys qalasynda — 28,7 myń ga, Maqtaaral aýdanynda — 63,8 myń ga, Jetisaı aýdanynda — 83,2 myń gektar jer sorlanyp ketken, — delingen Túrkistan oblysy aýyl sharýashylyǵy basqarmasy basshysynyń mindetin atqarýshy A.Plalov usynǵan aqparatta.
Búgingi tańda oblys aýmaǵynda sor shaıý jumystary júrip jatyr. Degenmen sharýalarǵa bul qosymsha jumys ári shyǵyn ekeni anyq.
— Sor shaımasaq, eginimiz óspeı qalady. Tipti boıy da kóterilmeıdi. Maqtanyń ózi de solaı. Sondyqtan jylda sor shaıý jumysyn júrgizemiz. Oǵan Ózbekstannan keletin kanaldyń sýyn paıdalanamyz. Ol sý da keı jyldary ýaqytyly kelmeı qalady. Al, jumys kesh bastalǵandyqtan eginimiz de kesh shyǵady. Bul bizge bir jaǵynan qosymsha jumys, ári shyǵyn, — deıdi maqtaaaraldyq sharýa Aǵyt Dúısenbıev.
Al, aýyl sharýashylyǵy ǵylymdarynyń kandıdaty Asanbaı Taǵaev aımaqtaǵy drenajdar tolyq jumys istemeı bul problemadan qutylý qıyn degen pikirde.
— Naýryz aıynan bastap Maqtaaral, Jetisaı aýdandarynda jerasty sýy joǵary kóteriledi. Sýmen birge tuz ben sor da jer betine shyǵady. Al, mamyr aıynda sý tómen túskende tuzdar jer betinde qalyp ketedi. Sondyqtan mindetti túrde egistikti shaımasa bolmaıdy. Onda da alqapqa sýdy toltyryp ustap, keıin aǵyzyp jiberý qajet. Sodan soń egistikti tereń qopsytyp, tegisteý jumysy júrgiziledi. Keıin fosfor men organıkalyq tyńaıtqyshtar sebiledi. Buryn kóń sebiletin. Qazir berilmeıdi. Bul búgingi sharýalardyń basty máselesi bolyp otyr. Sor shaıýdan qutylý úshin aımaqtaǵy drenajdardy tolyǵymen iske qosý qajet. Sonda jerasty sýy kóterilmeıdi. Sý joǵary kóterilmegendikten sor da jer betine shyqpaıdy, — deıdi Asanbaı Taǵaev.
Aıta keteıik, budan buryn Túrkistan oblysynyń sharýalary qysta kartop pen qyryqqabat egip jatqanyn jazǵan bolatynbyz.