Túrkistan oblysynda aýyl ishinde júrgen aıý beınekameraǵa túsip qaldy

TÚRKІSTAN. KAZINFORM – Aıýdy jergilikti turǵyndar kólikpen qýyp, aýyl aýmaǵynan shyǵaryp jibergen. 

Jelige júktelgen vıdeoǵa pikir jazýshylar jabaıy ańdy Mashat shatqalynan keldi dep boljaǵan. Al, vıdeony kórgen «Syrdarııa-Túrkistan» memlekettik óńirlik tabıǵı parkiniń ǵylymı qyzmetkeri Ǵanı Nazarbek aıý qonjyǵyn izdep kelgen bolýy múmkin degen pikir bildirdi. 

«Olar ádette adasa qoımaıdy jáne tosyn jaǵdaılardan úrkise aýylǵa kelmeıdi. Negizi Mashat shatqalynda aıý joq. Odan ármen qaraı ornalasqan Aqsý kanonynda ǵana bar. Menińshe, aıý aýylǵa qonjyǵyn izdep keldi. Bizde keı aýyldyń turǵyndary qonjyqty atyp alady nemese tirideı ustap, úıine alyp ketedi. Sondaı jaǵdaılardan keıin aıý qonjyǵynyń izine túsken bolýy múmkin» - deıdi Ǵanı Nazarbek.

Eske sala keteıik, buǵan deıin Almaty zoobaǵynda Pragadan jetkizilgen aq aıý ólip qalǵanyn jazǵan edik.