Túrkistan oblysynda ataýly áleýmettik kómek alýshylar sany eki ese azaıdy

TÚRKІSTAN. KAZINFORM — Bul týraly óńirdiń áleýmettik-ekonomıkalyq damýy týraly baspasóz máslıhatynda Túrkistan oblysynyń ákimi Darhan Satybaldy baıandady.

– Respýblıkadaǵy kópbalaly otbasylardyń aýqymdy bóligi bizdiń oblysymyzǵa tıesili. Eńbekke qabiletti jastardyń úlesi mol. Sondyqtan, biz jumys oryndaryn ashý máselesin nazarda ustap otyrmyz. Túrli memlekettik baǵdarlamalar, óndiris oryndaryn ashý arqyly turǵyndar eńbekke tartylýda. Júıeli atqarǵan jumystyń arqasynda sońǵy eki jylda ataýly áleýmettik kómek alýshylar sanyn 2 esege deıin, ıaǵnı, 92,4 myń adamǵa nemese 53%-ǵa tómendetýge qol jetkizdik. 2022 jyly ataýly áleýmettik kómek alýshylar sany 198 myń adam bolsa, búginde 92,4 myń adamdy qurap otyr. Jumys oryndaryn ashý – bizdiń negizgi baǵytymyz, – dedi Darhan Satybaldy.

Aıta keteıik, Túrkistan oblysynda bıyl «Óńirlik jumyspen qamtý kartasy» aıasynda 118 myńnan astam jumys ornyn ashý josparlanyp, qazirgi tańda 104 635 jumys orny qurylǵan.

Jýyrda Ulybrıtanııanyń Qazaqstandaǵy elshisi Ketı Lıch Túrkistanǵa kelip, shetelge jumys kúshterin daıyndaıtyn arnaıy ortalyqtyń ashylýyna qatysty. Bul ortalyqta Ulybrıtanııa jáne Ońtústik Koreıada jumys istegisi keletin azamattardy oqytyp, daıyndaıdy.