Túrkistan oblysynda agroındýstrııalyq klaster qurylady
TÚRKІSTAN. KAZINFORM – Túrkistan oblysynyń ákimi Nuralhan Kósherov bastaǵan resmı jáne iskerlik delegatsııa músheleri Qytaı eline jumys saparyn Shandýn provıntsııasynyń Tszının qalasynda jalǵastyrdy.
apar barysynda sarymsaq óndirisi boıynsha álemdegi kóshbasshy sanalatyn «Wanglin Group» kompanııasynyń basshysymen mańyzdy kezdesýler ótip, strategııalyq áriptestik týraly kelissózder júrgizildi. Óńirdiń agrarlyq sektordaǵy ınvestıtsııalyq jobalaryn talqylaýǵa basymdyq berildi. Kezdesý barysynda sarymsaq ósirý jáne óńdeý baǵytynda birlesken jobalar júzege asyrý máselesi kóterildi.
Halyqaralyq kompanııa óz tájirıbelerimen bólisip, Túrkistan oblysynyń agroklımattyq jaǵdaıyn joǵary baǵalady. Investorlar tarapynan óńirge naqty qarjy salý, zamanaýı qaıta óńdeý zaýyttaryn salý jáne eksporttyq logıstıkany damytý máselesi talqylandy.
Kezdesý nátıjesinde taraptar Túrkistan oblysynda agroındýstrııalyq klaster qurý, sarymsaq ósirý kólemin arttyrý, fermerlermen uzaq merzimdi kelisimsharttar ornatý jáne daıyn ónimdi shetelge eksporttaý baǵytynda birlesip jumys isteýge ýaǵdalasty.
Sapar aıasynda delegatsııa kompanııanyń óńdeý tsehtary men logıstıkalyq ınfraqurylymymen tanysyp, sarymsaqty tereń óńdeý men eksportqa baǵyttalǵan óndiris alańynda boldy. Dúnıe júzindegi sarymsaq baǵasyn retteý ortalyǵynyń jumysymen tanysty.
Qytaıdyń eń iri sarymsaq óndirýshileriniń tarıhy tereńde. Kompanııanyń sarymsaq ónimderin qaıta óńdeý, muzdatý, keptirý, saqtaý jáne álemdik naryqqa shyǵarý salasynda 20 jyldan astam tájirıbesi bar. Jalpy egistik kólemi – 500 myń ga, jylyna 8 mln tonna ónim satýǵa shyǵarylady. Eksport kólemi – $4 mlrd. Saqtaý qoımasy – 4,8 mln tonna. Sarymsaqtan san alýan túrli dári-dármek, dárýmender shyǵarady.
– Búgingi kelissózder – Túrkistan oblysy úshin mańyzdy betburys. Biz aýyl sharýashylyǵy salasyn damytýdyń jańa kezeńine qadam basyp otyrmyz. Bul bastamalar – Prezıdentimizdiń aýyl ekonomıkasyn kóterý jónindegi tapsyrmasyna tolyq saı keledi. Eń bastysy – aýyl turǵyndaryna naqty paıda ákeletin, turaqty tabys beretin jobalardy iske asyrý. Bizdiń dıqandar tabıǵı ónim óndirýge mashyqtanǵan. Endi olardy halyqaralyq naryqqa shyǵarý úshin jańa tehnologııalar men ınvestıtsııalar qajet. Bul – jumys oryndaryn kóbeıtýge, aýyldaǵy tabysty arttyrýǵa, eksport kólemin ulǵaıtýǵa sep bolady. Biz osyǵan bar kúshimizdi salamyz, – dep túıindedi Túrkistan oblysynyń ákimi Nuralhan Kósherov.
Sapar aıasynda Túrkistan oblysynyń delegatsııasy qytaılyq agrarlyq tehnoparkterdiń jumysymen tanysyp, óńdelgen aýyl sharýashylyǵy ónimderin saqtaý, logıstıka men eksportqa shyǵarý mehanızmderi boıynsha tájirıbe almasty.
Sondaı-aq delegatsııa sarymsaq salasyna arnalǵan memlekettik mýzeıge baryp, Qytaıdyń agroónerkásip salasyndaǵy jetistikterimen, sarymsaq ósirý jáne óńdeý tarıhymen tanysty. Mýzeı ekspozıtsııasynda ejelgi dáýirden búginge deıingi tehnologııalar men ǵylymı jetistikter usynylǵan.
Túrkistan oblysy – aýyl sharýashylyǵy ónimderin óndirý boıynsha jetekshi óńirlerdiń biri. Jyl saıyn ondaǵan myń gektar jerge sarymsaq, pııaz, kókónis jáne baqsha daqyldary egiledi. Oblysta agrarlyq sektordy ártaraptandyrý, qaıta óńdeý kásiporyndaryn kóbeıtý, sýarmaly eginshilikti damytý maqsatynda júıeli jumys júrgizilýde. Qazirgi tańda oblysta aýyl sharýashylyǵy salasyna sheteldik ınvestıtsııa tartýǵa barynsha jaǵdaı jasalyp otyr. 2025 jyly óńirge tartylǵan tikeleı sheteldik ınvestıtsııa kólemin 30%-ǵa arttyrý josparlanǵan.
Aıta ketelik Túrkistan oblysy Aýstralııa tájirıbesimen et klasterin damytatyny týraly jazǵan edik.