Túrkistan oblysynda 8 jastaǵy bala telefon jóndeıdi
TÚRKІSTAN. KAZINFORM – Keles aýdanynyń Abaı aýylynda tehnıkaǵa erekshe beıimi bar bala ósip keledi. Ol – nebári segiz jastaǵy Aıdyn Bekjanuly.
Aýyl shetinde ornalasqan shaǵyn sheberhanaǵa kún saıyn túrli jastaǵy adamdar keledi. Biri ekran synǵanyn, biri batyrmasy istemeı qalǵanyn, endi biri sýǵa túsken telefondy jóndeýdi suraıdy. Ákesiniń qasynda otyrǵan sııaqty kórinetin Aıdyn bir sátte ústelge jaıǵasyp, burandany qolyna alady da, iske kirisedi.
Telefondy ashyp, aqaýyn anyqtaý – oǵan qıyn emes. Qajetti bólshekterin aýystyryp, sanaýly sátte buzylǵan qurylǵyny babyna keltiredi. Muny kórgen aýyldastary onyń sheberligine tań qalady.
Aıdyn – Ózbekáli Jánibekov atyndaǵy mektep-gımnazııasynyń oqýshysy. Bıyl úshinshi synypty aıaqtap, tórtinshi synypqa kóshti. Kóp bala jazǵy demalysyn oıynmen ótkizse, ol bul ýaqytty eńbektenýge paıdalanyp júr. Ákesine kómektesý – onyń kúndelikti daǵdysyna aınalǵan.
Ákesi Bekjan Ótenov 2021 jyldan beri aýylda telefon jóndeý qyzmetin kórsetedi. Qazir uly – sheberhananyń naǵyz serigi. Aıdyn túrli markaly telefondardy tarqatyp, qaıta jınaı alady, aqaýlaryn derbes anyqtaıdy. Qaýipsizdik úshin elektr togymen baılanysty jumystardy ákesi atqarady, biraq qalǵanynyń bárin Aıdyn ózi isteıdi.
— Bala kishkentaıynan janymnan shyqpaıtyn. Bólshektengen telefonǵa qyzyǵyp, ár detaldi suraıtyn. Ýaqyt óte ózi qurastyryp, aqaýyn taba bastady. Eshqandaı kýrstan ótken joq, bárin tájirıbeden úırendi. Bul – tabıǵı talant, – deıdi ákesi maqtanyshpen.
Bes balaly shańyraqtyń úshinshisi sanalatyn Aıdyn bos ýaqytynda telefon qurylymyn ǵana emes, kompıýter men túrli gadjetterdiń jumysyn da zertteıdi. Bolashaqta ınjener nemese IT mamany bolýdy armandaıdy.
Ata-anasy balanyń talabyn erte baıqap, barynsha qoldap keledi.
– Qolynan keletin iske yntalandyryp, qajetti qural-jabdyqpen qamtamasyz etemiz. Bastysy – qyzyǵýshylyǵy joǵalmasyn, – deıdi ákesi.
Búginde Aıdyn aýylda júrip-aq álemdik tehnologııa jańalyqtaryn qyzyǵyp qadaǵalaıdy, ınternetten telefon óndirisi men jóndeý tásilderin úırenedi.
Búginde ol – aýyldyń maqtanyshy, erteń – elimizdiń tehnıkalyq salasynda ózindik orny bar maman bolýy yqtımal. Onyń ómir joly – eńbek, izdenis jáne otbasy qoldaýynyń jarqyn úlgisi.
Aıta keteıik, budan buryn Túrkistanda Abaıdyń 180 jyldyǵyna oraı jastar men turǵyndarǵa «Abaı joly» romany taratylǵanyn jazǵan bolatynbyz.