Túrkistan oblysynda 7 myń adamdy jumyspen qamtıtyn jylyjaı salynyp jatyr
TÚRKІSTAN. KAZINFORM – Keles aýdanynda elimizdegi eń úlken jylyjaı kesheni salynyp jatyr. Aýmaǵy 500 gektardan asatyn keshende jylyna 240 myń tonna kókónis ósirilmek. Túrkistan oblysynyń ákimi Darhan Satybaldy aýqymdy jobany júzege asyryp jatqan jatqan «Eko-kýltýra» holdınginiń prezıdenti Aleksandr Rýdakov bastaǵan ınvestorlarmen agro saladaǵy yntymaqtastyq máselelerin talqylady.
Qazir Keles aýdanynda 51 gektar jerde jobanyń alǵashqy kezeńi júzege asyp jatyr. Ol keler jyly iske qosylady. 7 myń adam jumyspen qamtylady. Investıtsııa kólemi – 524 mlrd. teńge.
Keler jyldyń basynan bastap jylyjaılar iske qosyla bastaıdy. Jyl sońynda qurylysy tolyq aıaqtalyp, aýqymdy jumystar júzege asyrylady. Kezdesýde taraptar birqatar birlesken jobany talqylady.
Oblys ákimi ınvestorlarǵa aýyl sharýashylyǵymen birge, ındýstrııa, týrızm baǵyttary boıynsha jańa jobalardy qolǵa alýǵa shaqyrdy. Óńirdegi óndiristik parkterde óndiris oryndaryn ashý joldaryn túsindirip, egistikti ártaraptandyrý, aýqymyn arttyrý, jemis saqtaý qoımalaryn salý sekildi jańa jobalardy bastaýǵa shaqyrdy. Sondaı-aq sýblımatsııa, ıaǵnı konservatsııalaýdyń eń jetildirilgen ádisteriniń birin damytýdy usyndy. Bul ádis eshqandaı hımııany nemese konservanttardy qajet etpeıdi jáne qaptamanyń túrine baılanysty muzdatylǵan keptirilgen ónimderdi ondaǵan jyldarǵa saqtaýǵa bolady.
«Túrkistanǵa qosh keldińizder. Búgingi kezdesýde ózderińizdi óńirimizde ózge de tyń jobalardy bastaýǵa shaqyramyz. Bul baǵytta birqatar usynys qorjynyn qurdyq. Yntymaqtastyǵymyz ózara tıimdi bolyp, úlken perspektıvalarǵa jol ashyp, turaqty túrde damı beretinine senimdimin. Túrkistan oblysy ınvestıtsııalyq baılanystardy tereńdetip, jańa birlesken jobalardy júzege asyrýǵa daıyn. Atqaryp jatqan jumystarmen birge, óndiristi damytýǵa, tereń óńdeý, óndiris oryndaryn ashýǵa qatysty birqatar qosymsha jobany usynǵaly otyrmyz. Óz tarapymyzdan olardy jan-jaqty qoldaýǵa daıynbyz. Turǵyndarymyzdy jergilikti ónimmen qamtyp, jumys oryndaryn kóptep ashý – basty maqsatymyz. Ónimdi saqtaýdy, qaıta óńdeýdi júzege asyra alamyz. Sizderdiń suranystaryńyzǵa saı ózimizdiń sharýalar daıyn ónimin usyna alady. Aýyl sharýashylyǵy salasynda kósh bastap keletin bizdiń oblysta osy salany barynsha damytýǵa múddelimiz. Bul baǵyttaǵy barlyq bastamaǵa barynsha qoldaý kórsetýge daıynbyz», - dedi Darhan Satybaldy.
Óz kezeginde «Eko-kýltýra» holdınginiń prezıdenti Aleksandr Rýdakov búgin «Eko-kýltýra» holdınginiń barlyq basshysymen birge kelip otyrǵanyn aıtty.
«Kúni keshe ǵana kelisip, búgin kezdesip otyrǵanymyzǵa qýynyshtymyz. Eki jaqtyń da kózdegeni bir. Bizge jan-jaqty qoldaý bildirgenderińizge alǵys aıtamyz. Sózdi ispen dáleldep jatqanyńyz qýantady. Infraqurylym ýaqytynan buryn daıyn boldy. Ári qaraı birge eńbek etetinimizge senemin. Keles aýdanyndaǵy jobamyz aldaǵy aqpan aıynda iske qosyla bastaıdy. Jumysshylardy qabyldap, barlyq áleýmettik qoldaý kórsetemiz. 2025 jyldyń aıaǵynda qurylys tolyq aıaqtalyp, aýqymdy jumysty bastaımyz. Biz baılyqqa kenelý úshin emes, ınvestıtsııa quıyp, jumys oryndaryn barynsha ashý úshin keldik. Ony oryndaýǵa kúsh salamyz. Jańa ıdeıalaryńyz, tyń jobalaryńyz úshin alǵys aıtamyz. Naqty suranysqa ıe jemis-jıdek, kókónistiń assortımentin arttyrýǵa daıynbyz. Jergelikti naryqty qamtyp qana qoımaı, Reseı, Dýbaı, Qytaıǵa eksporttaı alamyz. Jańa jobalardy júzege asyrý baǵyttaryn áli naqtylap, birlese júzege asyrýǵa kúshimizdi salamyz», - dedi Aleksandr Rýdakov.
Talqylaý qorytyndysy boıynsha taraptar aıtylǵan barlyq usynys pen pikirlerdiń pysyqtalatynyn atap ótti.
Túrkistan oblysy – respýblıka halqyn jemis-kókónis ónimderimen, onyń ishinde jylyjaı keshenindegi qyzanaq, qııarmen qamtamasyz etetin negizgi óńir. Oblysta 2 myń gektar alqapta 3 myńnan astam jylyjaı bar nemese respýblıkadaǵy jylyjaılardyń 71 paıyzy ornalasqan. Onda 12 myńnan astam adam eńbek etedi. Osy salaǵa tartylǵan ınvestıtsııa kólemi 7 ese ulǵaıdy.
«EKO-kýltýra» – 13 jyl boıy turaqty damyp kele jatqan, jabyq topyraqta ekologııalyq taza kókónis ósiretin iri agroónerkásiptik holdıngtiń biri. Bir jyl ishinde óndirgen ónim kólemi 300 myń tonnadan asady.
